Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 81

Te A‘oraa i nia i te mou‘a

Te A‘oraa i nia i te mou‘a

I muri a‘e i te maitiraa i na aposetolo 12, ua pou maira o Iesu mai nia mai i te mou‘a no te haere i te hoê vahi i haaputuputuhia ’i te hoê nahoa taata. No ǒ mai ratou mai Galilea, Iudea, Turia, Sidona, Arama e mai te tahi atu pae o Ioridana. Ua afaihia mai te mau taata tei ma‘ihia e tei uruhia e te mau demoni. Ua faaora Iesu ia ratou pauroa. I muri iho, ua parahi oia i te pae mou‘a e ua haamata oia i te paraparau. Ua faataa Iesu eaha te mea tia ia tatou ia rave no te riro ei hoa no te Atua. E mea tia ia tatou ia taa e mea faufaa roa o Iehova i roto i to tatou oraraa e ia haapii ia here ia ’na. Tera râ, aita tatou e nehenehe e here i te Atua mai te peu e aita tatou e here ra ia vetahi ê. E mea tia ia riro tatou ei taata mǎrû e te haapao maitai no vetahi ê, oia atoa no to tatou mau enemi.

Ua parau Iesu: ‘Aita e navai ia here i to outou noa mau hoa. E mea titau-atoa-hia ia here i to outou mau enemi e ia faaore i te hapa a vetahi ê ma te aau tae. Mai te peu e ua riri te tahi taata ia outou, a haere oioi e farerei ia ’na e a tatarahapa ’tu. Te mau mea atoa ta outou e hinaaro ia rave te taata no outou, a rave atoa ïa no ratou.’

 Ua horoa atoa ’tu Iesu i te mau a‘oraa maitai no nia i te mau mea pae materia. Ua na ô oia: ‘Mea faufaa a‘e ia riro ei hoa no Iehova i te fana‘oraa i e rave rahi moni. E nehenehe te hoê taata eiâ e rave i ta outou moni. Aita hoê a‘e râ taata o te nehenehe e faaore i to outou auhoaraa e o Iehova. Eiaha e haapeapea noa no nia i ta outou e amu, e inu aore ra e ahu. A hi‘o na i te mau manu. Te haapao noa ra te Atua e e maa noâ anei ta ratou. Eita outou e ora maoro a‘e ia haapeapea noa outou. A haamana‘o na: ua ite Iehova eaha to outou mau hinaaro mau.’

Aita roa ’tu te nahoa taata i faaroo a‘enei i te hoê taata tei paraparau mai ia Iesu. Aita ta ratou mau aratai haapaoraa i haapii atu i tera mau mana‘o. No te aha ua riro Iesu ei orometua rahi? No te mea te mau haapiiraa atoa ta Iesu i horoa ’tu, no ô mai hoi ia Iehova.

“A rave mai i ta ’u zugo i nia ia outou e ia haapiihia outou e au, mea mǎrû hoi au e te haehaa o te aau, e ite ïa outou i te tamahanahanaraa.”—Mataio 11:29