Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 5

Te araka a Noa

Te araka a Noa

A mairi ai te tau, ua rahi atu â te taata i nia i te fenua. Mea ino râ te rahiraa. Ua riro atoa te tahi mau melahi i nia i te ra‘i ei melahi ino. Ua faarue ratou i to ratou nohoraa i te ra‘i no te haere mai i nia i te fenua. Ua ite anei oe no te aha ratou i na reira ’i? No te mea ua hinaaro ratou e rave i te tino taata e e faaipoipo i te mau vahine.

Ua tamariihia teie mau melahi e ta ratou mau vahine. Ua paari mai ta ratou mau tamarii e ua riro ratou ei taata puai roa o tei hamani ino ia vetahi ê. Aita Iehova i nehenehe e vaiiho ia tupu te reira. Ua faaoti oia i te haapohe i te feia ino ma te faatupu i te hoê diluvi.

Te vai ra râ te tahi taata mea taa ê oia. Ua here mau oia ia Iehova. O Noa to ’na i‘oa. E vahine ta ’na e e toru tamaiti: o Sema, Hama e Iapheta. Ua faaipoipo pauroa ta Noa mau tamaiti. Ua faaue Iehova ia Noa ia patu i te hoê araka rahi, mai te hoê afata rarahi ïa, o te ore e tomo. Ia tupu mai te diluvi, e faaorahia Noa e to ’na utuafare maoti teie araka. Ua faaue atoa Iehova ia Noa ia aratai i te mau animara e rave rahi i roto i te araka ia nehenehe atoa ratou e ora.

Ua haamata oioi Noa i te patu i te araka. Ua na reira oia e to ’na utuafare fatata e 50 matahiti i te maoro. Ua patu ratou i te araka mai ta Iehova iho â i faaue atu. I taua taime ra, ua faaara atoa Noa i te mau taata e e tupu te diluvi. Aita râ hoê a‘e tei faaroo ia ’na.

Ua tae mai te taime no te haere i roto i te araka. A hi‘o na eaha tei tupu i muri iho.

“E riro hoi te tau o te ho‘iraa mai o te Tamaiti a te taata nei mai te tau o Noa ra.”—Mataio 24:37