Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 98

Ua haapararehia te Kerisetianoraa i e rave rahi fenua

Ua haapararehia te Kerisetianoraa i e rave rahi fenua

Ua faaroo te mau aposetolo i te faaueraa a Iesu, oia hoi ia poro i te parau apî oaoa e ati a‘e te fenua. I te matahiti 47, ua tono te mau taeae no Anetiohia ia Paulo raua Baranaba no te hoê tere pororaa. Ua tere na taata poro itoito mau i Asia Iti, oia atoa i te mau vahi mai ia Derebe, Ikonio e Lusetera.

Ua poro o Paulo raua Baranaba i te mau taata atoa, te feia moni anei aore ra veve, te feia apî aore ra ruhiruhia. E rave rahi tei farii i te parau mau no nia i te Mesia. A poro ai o Paulo raua Baranaba ia Serigio Paulo, te tavana o Kupero, ua tamata te hoê taata tahutahu i te tapea ia ratou. Ua parau o Paulo i taua taata tahutahu ra: ‘E faautua Iehova ia oe.’ I taua taime iho â, ua matapohia te taata tahutahu. A ite ai i te reira, ua riro atura te tavana Paulo ei pǐpǐ.

Ua poro o Paulo raua Baranaba i te mau vahi atoa, oia hoi i tera e tera fare, i te mau vahi hoohooraa, i nia i te purumu e i te mau sunago. Ua faaora raua i te hoê taata pirioi i Lusetera. A faatupu ai raua i tera semeio, ua mana‘o te mau taata tei ite i te reira e e mau atua raua. Ua tamata ihora ratou i te haamori ia raua. Ua patoi râ o Paulo raua Baranaba i te reira ma te parau: ‘A haamori i te Atua noa! E mau taata noa hoi maua.’ I muri iho, ua tae mai vetahi ati Iuda e ua turai ratou i te nahoa ia patoi ia Paulo. Ua pehi te nahoa ia ’na i te ofai. Ua huti ratou ia ’na i rapaeau i te oire e ua vaiiho ratou ia ’na i reira ia pohe oia. Tera râ, mea ora noâ o Paulo! Ua haere atura te mau taeae e tauturu ia ’na e e faaho‘i ia ’na i te oire. I muri iho, ua ho‘i o Paulo i Anetiohia.

I te matahiti 49, ua tere faahou â o Paulo. Ua farerei faahou oia i te mau taeae no Asia Iti. I muri iho, ua poro oia i te parau apî oaoa i te mau vahi atea  roa, oia atoa i Europa. Ua haere oia i Ateno, i Ephesia, i Philipi, i Tesalonia e i te tahi atu mau fenua. Ua apiti atoa o Sila, Luka e te hoê taata apî, o Timoteo to ’na i‘oa, ia Paulo i roto i to ’na tere. Ua ohipa amui ratou no te haamau i te mau amuiraa e no te tauturu atu ia puai mai. Ua faaea o Paulo i Korinetia hoê matahiti e te afa i te maoro no te faaitoito i te mau taeae o tera fenua. Ua poro, ua haapii atu e ua papai oia i te mau rata no e rave rahi amuiraa. Ua ohipa atoa oia ei taata hamani fare ie. I te taime tano, ua ho‘i o Paulo i Anetiohia.

I muri iho, i te matahiti 52, ua tere o Paulo i te toruraa o te taime. Ua haamata te reira i Asia Iti. Ua haere atea oia i Philipi i te pae apatoerau e i muri iho, ua haere oia i te pae apatoa i Korinetia. Ua faaea o Paulo e rave rahi matahiti i Ephesia no te haapii atu, faaora i te taata e tauturu i te amuiraa. I te mau mahana atoa, ua vauvau oia i te mau oreroraa parau no te taatoaraa i te hoê piha rarahi o te tahi fare haapiiraa. Ua faaroo e rave rahi taata ia ’na e ua taui ratou i to ratou mau haerea. I muri a‘e i to ’na pororaa i te parau apî oaoa i e rave rahi fenua, ua haere o Paulo i Ierusalema.

“A haere ïa e faariro i te taata o te mau nunaa atoa ei pǐpǐ na ’u.”—Mataio 28:19