Eaha to roto?

Tapura tumu parau

 HAAPIIRAA 78

Ua poro Iesu i te poroi no nia i te Faatereraa arii

Ua poro Iesu i te poroi no nia i te Faatereraa arii

I muri noa mai i to ˈna bapetizoraa, ua haamata Iesu i te poro: ‘Fatata roa te Faatereraa arii a te Atua i te tae mai.’ Ua pee te mau pǐpǐ ia ˈna a tere ai oia i Galilea e i Iudea. I hoˈi na Iesu i to ˈna oire tumu o Nazareta. Ua haere atura oia i te sunago, ua rave oia i te otaro a Isaia e ua taio oia i te reira ma te reo puai: ‘Ua horoa Iehova i te varua moˈa ia ˈu ia nehenehe au e poro i te parau apî oaoa.’ Eaha te auraa o tera parau? Ua hinaaro te mau taata e ite i te mau semeio a Iesu. Tera râ, te tumu matamua i fanaˈo ai Iesu i te varua moˈa, no te poro ïa i te parau apî oaoa. I muri iho, ua parau oia i te feia tei faaroo ia ˈna: ‘I teie mahana, ua faatupuhia teie parau tohu.’

I muri iho, ua haere Iesu i te miti o Galilea. I reira oia i farerei ai e maha o ta ˈna mau pǐpǐ. E feia ravaai ratou. Ua parau Iesu ia ratou: ‘A pee mai ia ˈu e e faariro vau ia outou ei feia ravaai taata.’ O Petero ïa, Anederea, Iakobo e o Ioane. Oioi ratou i te faarueraa i ta ratou ohipa ravaai no te apee ia Iesu. Ua haere ratou i te mau vahi atoa i Galilea no te poro atu no nia i te Faatereraa arii a Iehova. Ua poro ratou i te mau sunago, i te matete e i te mau aroa. Ua pee te hoê nahoa rahi ia ratou, i te mau vahi atoa i haere ai ratou. Ua faarooroohia no nia ia Iesu i te mau vahi atoa, oia atoa i te mau vahi atea mai Arama.

I muri iho, ua horoa Iesu ia vetahi o ta ˈna mau pǐpǐ i te mana no te faaora i te feia maˈi e no te tiavaru i te mau demoni. Ua haere te tahi atu e poro na muri ia ˈna i tera e tera oire e i tera e tera oire iti. Na e rave rahi vahine taiva ore, mai ia Maria Magadala, Ioana, Susana e te vai atu â, i haapao maitai ia Iesu e i ta ˈna mau pǐpǐ.

I muri aˈe i te faaineineraa i ta ˈna mau pǐpǐ, ua tono Iesu ia ratou no te haere e poro. A tere ai i Galilea, e rave rahi atu â taata tei riro ei pǐpǐ e tei bapetizohia. No te rahi o te taata tei hinaaro e riro ei pǐpǐ, ua faaau Iesu ia ratou i te hoê aua tei ineine no te auhune. Ua parau oia: ‘A pure ia Iehova ia tono mai oia hau atu â feia rave ohipa no te auhuneraa.’ I muri iho, ua maiti oia e 70 o ta ˈna mau pǐpǐ e ua tono tataipiti oia ia ratou no te poro  i Iudea. Ua haapii atu ratou i te mau taata atoa no nia i te Faatereraa arii. I to ratou hoˈiraa ia Iesu ra, ua oaoa roa ratou i te faaite ia ˈna eaha tei tupu. Aita hoê aˈe ohipa ta te Diabolo e nehenehe e rave ia faaea te ohipa pororaa.

Ua vai ara o Iesu ia tamau ta ˈna mau pǐpǐ i te rave i teie ohipa faufaa roa i muri aˈe i to ˈna hoˈiraa ˈtu i te raˈi. Ua parau atu Iesu: ‘A poro i te parau apî oaoa e ati aˈe te fenua. A haapii atu i te mau taata no nia i te Parau a te Atua e a bapetizo ia ratou.’

“Ia faaite atoa vau i te parau apî oaoa o te Faatereraa arii a te Atua i te tahi atu mau oire e tia ˈi, no reira hoi au i tonohia mai ai.”—Luka 4:43