Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 11

Ua tamatahia to faaroo

Ua tamatahia to faaroo

Ua haapii Aberahama i ta ’na tamaiti o Isaaka ia here ia Iehova e ia tiaturi i ta Iehova mau parau fafau atoa. E 25 matahiti to Isaaka i teie nei. I tera taime, ua faaue Iehova ia Aberahama ia rave i te tahi ohipa fifi mau. Eaha ïa tera ohipa?

Ua parau te Atua ia Aberahama: ‘A rave na i ta oe tamaiti otahi e a pûpû ia ’na ei tusia i nia i te hoê mou‘a i te fenua o Moria.’ Aita roa ’tu Aberahama i ite no te aha Iehova i ani ai i te reira. Tera râ, ua faaroo noa oia ia Iehova.

I te mahana i muri iho, i te poipoi roa, ua haere Aberahama, Isaaka e e piti tavini i Moria. Toru mahana i muri iho, ua ite ratou i te mau mou‘a i te atea. Ua parau atura Aberahama i ta ’na na tavini ia tiai noa i te tahi vahi no te mea e haere oia raua Isaaka e pûpû i te tahi tusia. Ua ani Aberahama ia Isaaka ia amo i te raau e ua rave Aberahama i te hoê tipi. Ani atura Isaaka i to ’na metua tane: ‘Teihea roa te animara ta tâua e pûpû atu?’ Pahono atura Aberahama: ‘Ta ’u tamaiti e, na Iehova e horoa mai i te reira.’

Tae atura raua i nia i te mou‘a e patu atura raua i te hoê fata. I muri iho, ua taamu Aberahama i to Isaaka na rima e avae e ua tuu atu oia ia ’na i nia i te fata.

Rave atura Aberahama i te tipi. I tera taime, ua parau te melahi a Iehova mai te ra‘i mai: ‘Aberahama! Eiaha e haamauiui i te tamaiti! Ua ite au i teie nei e te tiaturi nei iho â oe i te Atua no te mea ua ineine oe i te pûpû i ta oe tamaiti ei tusia.’ Ite atura Aberahama i te hoê mamoe  oni, ua mau to ’na na pu i roto i te raau. Oioi oia i te tatara i te taura i nia ia Isaaka e i te pûpû i te mamoe oni ei tusia.

Mai tera mahana, ua pii Iehova ia Aberahama to ’na hoa. Ua ite anei oe no te aha? Ua rave Aberahama i te mau mea atoa ta Iehova i hinaaro, noa ’tu aita oia i taa no te aha Iehova i faaue atu ai ia rave i te tahi ohipa.

Ua fafau faahou Iehova ia Aberahama: ‘E haamaitai au ia oe e e rahi atu â tamarii aore ra huaai ta oe.’ Ua fafau atoa Iehova e e haamaitai oia i te mau taata maitai atoa na roto i te utuafare o Aberahama.

“No to ’na here rahi i to te ao i horoa mai ai te Atua i ta ’na Tamaiti otahi ia ore ia mou te taata o te faatupu i te faaroo ia ’na, ia roaa râ te ora mure ore.”—Ioane 3:16

No te ite atu â

A PEE I TO RATOU FAAROO

Aberahama: ‘Te metua o te taata atoa i faaroo’

Mea nafea Aberahama i te faaiteraa i te faaroo? E nafea oe e pee ai i te faaroo o Aberahama?