Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 22

Te semeio i te miti Uteute

Te semeio i te miti Uteute

I to Pharao faarooraa e ua faarue to Iseraela ia Aiphiti, ua taui oia i to ’na mana‘o. Aita oia i hinaaro faahou ia haere ê atu to Iseraela. Ua faaue oia i ta ’na mau faehau: ‘A faaineine i ta ’u mau pereoo tama‘i atoa. E a‘ua‘u ana‘e ia ratou! E ere i te mea tano ia vaiiho ia ratou ia haere ê.’ Haamata ’tura oia e ta ’na mau faehau i te a‘ua‘u i to Iseraela.

Na Iehova i aratai i to ’na nunaa ma te faaohipa i te hoê ata i te roaraa o te mahana e i te auahi i te po. Ua aratai oia ia ratou i te miti Uteute e ua parau atu oia ia faatia i te puhapa i ô.

Ite atura to Iseraela ia Pharao e i ta ’na nuu o te a‘ua‘u ra ia ratou. I mua ia ratou, te vai ra te miti Uteute e i muri, te nuu Aiphiti. Tuô atura ratou ia Mose: ‘E pohe tatou! Ahiri oe i vaiiho ia matou i Aiphiti.’ Ua parau râ Mose: ‘Eiaha e mǎta‘u. A hi‘o e nafea Iehova e faaora ’i ia tatou.’ Ua tiaturi iho â Mose ia Iehova, e ere anei?

Ua parau Iehova i to Iseraela ia faarue i te puhapa. I taua po ra, ua tuu Iehova i te ata i rotopu i te nuu Aiphiti e i to Iseraela. I te pae o to Aiphiti, ua poiri roa. I to Iseraela râ pae, e maramarama ïa.

Ua parau Iehova ia Mose ia toro i to ’na rima i te miti. Faatupu atura  Iehova i te hoê mata‘i puai o tei pupuhi i te po taatoa. Amaha ’tura te miti e ua itehia te hoê e‘a i ropu i te miti. Ua nehenehe e mirioni Iseraela e haere na ropu i te miti no te tae i te tahi atu pae.

Apee atura te nuu a Pharao i to Iseraela na ropu i te miti na nia i te e‘a mǎrô. I muri iho ua faatupu Iehova i te arepurepu i rotopu i te nuu. Pee atura te mau huira o to ratou mau pereoo. Tuô atura te mau faehau: ‘Eiaha e faaea i ô nei! Te aro nei Iehova no ratou.’

Ua parau Iehova ia Mose: ‘A toro i to oe rima i te miti.’ Topa ’tura te pape i nia i te nuu Aiphiti. Ua pohe Pharao e ta ’na mau faehau atoa. Aita roa ’tu hoê a‘e i ora mai.

I te tahi atu pae o te miti, ua himene te nunaa rahi no te arue i te Atua: “E himene au ia Iehova, ua teitei hanahana roa hoi oia: o te puaahorofenua e o tei parahi i nia iho tei hurihia e ana i raro i te tai.” A himene ai te nunaa, ua ori te mau vahine ma te tupaipai i te mau tariparau. Ua oaoa roa ratou pauroa no te mea ua tiamâ ratou i teie nei.

“Ia itoito roa hoi tatou e ia parau: ‘O Iehova to ’u tauturu. E ore au e mǎta‘u. Eaha hoi ta te taata e nehenehe e rave i nia ia ’u?’”—Hebera 13:6