Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 25

Te hoê sekene no te haamori ia Iehova

Te hoê sekene no te haamori ia Iehova

I nia i te mou‘a Sinai, ua parau Iehova ia Mose ia patu i te hoê tiahapa taa ê, parauhia te sekene. I reira te mau Iseraela e haamori ai ia ’Na. E nehenehe ratou e afai i tera sekene ia ratou ra a haere ê ai ratou.

Ua parau Iehova: ‘A parau i te nunaa ia horoa i ta ratou e nehenehe no te patu i te sekene.’ Horoa ’tura to Iseraela i te auro, te ario, te veo, te mau ofai moni rahi e te mau piru. Ua horoa ’toa ratou i te huruhuru mamoe, te ahu lino, te mau iri animara e e rave rahi atu â tao‘a. Inaha mea rahi roa te tao‘a ta ratou i afai mai, ua parau atu Mose: ‘Ua oti, ua navai! Eiaha e afai faahou i te tao‘a.’

E rave rahi tane e vahine aravihi tei apiti mai i roto i te paturaa i te sekene. Maoti Iehova i aravihi roa ’i ratou i roto i te ohipa. Ua nira e ua hamani vetahi i te ahu. Ua ohipa te tahi atu i nia i te mau ofai moni rahi e te auro. Te vai atoa ra o tei tarai i te raau.

Ua patu te nunaa i te sekene mai ta Iehova i faaue atu. Ua hamani ratou i te hoê paruru nehenehe mau no te faataa i te sekene na roto e piti tuhaa: te Vahi Mo‘a e te Vahi Mo‘a Roa. I roto i te Vahi Mo‘a Roa, te vai ra te afata faufaa. Ua hamanihia te reira maoti te raau sitima e te auro. I roto i te Vahi Mo‘a, te vai ra te hoê vairaa lamepa auro, te hoê airaa maa e te hoê fata no te tutui i te mea no‘ano‘a. I roto i te aua, e itehia te hoê farii pape veo e te hoê fata rarahi. Maoti te afata faufaa, e haamana‘o te mau Iseraela i ta ratou i euhe, oia hoi ia faaroo ia Iehova. Ua ite anei oe eaha te hoê faufaa aore ra faaauraa? E au te reira i te hoê euhe taa ê.

 Ua maiti Iehova ia Aarona e i ta ’na mau tamaiti no te ohipa i te sekene ei tahu‘a. E mea titauhia ia ratou ia haapao i te sekene e ia pûpû i te mau tusia ia Iehova i te sekene. O Aarona ana‘e, te tahu‘a rahi, te nehenehe e tomo i roto i te Vahi Mo‘a Roa. E tomo atu oia hoê taime i te matahiti no te pûpû i te hoê tusia no ta ’na mau hara, te hara a to ’na utuafare e te hara a te nunaa Iseraela.

Ua oti te mau Iseraela i te paturaa o te sekene hoê matahiti i muri a‘e i to ratou faarueraa ia Aiphiti. I teie nei, e vahi ta ratou no te haamori ia Iehova.

Ua faaite Iehova e ua au roa oia i te sekene e ua faatupu oia i te hoê ata i nia i te reira. Ia vai te ata i nia i te sekene, e vai noa ïa to Iseraela i te vahi i faatiahia ’i te puhapa. Ia haere râ te ata i nia ’tu â, ua ite ia ratou e e taime tera no te haere ê. E amo ratou i te sekene e e pee ratou i te ata.

“Faaroo atura vau i te hoê reo puai no roto mai i te terono i te na ôraa: ‘Inaha, tei te huitaata ra te tiahapa o te Atua, e e faaea oia ia ratou ra, e e riro ratou ei nunaa no ’na. Ei pihai iho te Atua ia ratou.’”—Apokalupo 21:3