Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 65

Ua faaora Esetera i to ’na nunaa

Ua faaora Esetera i to ’na nunaa

E tamahine ati Iuda o Esetera. I ora na oia i Susana, te hoê oire no Peresia. E rave rahi matahiti i na mua ’tu, tei Ierusalema to ’na utuafare e ua haru Nebukanesa ia ratou. Na Moredekai ïa i faaamu ia Esetera. E taeae fetii hoi o Moredekai no Esetera e e tavini atoa oia na te arii Peresia, o Ahasueru.

Ua hinaaro te arii Ahasueru i te hoê arii vahine apî. Ua afai ïa ta ’na mau tavini i te mau vahine nehenehe roa ’‘e o te fenua, oia atoa ia Esetera. I rotopu i taua mau vahine atoa, ua maiti te arii ia Esetera ia riro oia ei arii vahine. Ua parau Moredekai ia Esetera ia ore e faaite atu e e vahine ati Iuda oia.

O te taata teoteo ra, o Hamana, te upoo o te hui arii o te fenua. Ua hinaaro oia ia tipapa te mau taata atoa i mua ia ’na. Ua patoi Moredekai i te na reira e no to ’na riri rahi ua hinaaro Hamana e haapohe ia ’na. I to Hamana iteraa e e taata ati Iuda o Moredekai, ua opua oia i te haapohe i te ati Iuda atoa o te fenua. Ua parau oia i te arii: ‘Mea ino mau te nunaa ati Iuda. E mea maitai ia haapohe ia ratou.’ Ua na ô Ahasueru: ‘A rave mai ta oe e hinaaro.’ E ua horoa te arii ia Hamana i te tiaraa no te haamau i te hoê ture. Ua haamau Hamana i te ture o tei faatia i te nunaa ia haapohe i te ati Iuda atoa i te 13 no te ava‘e Adara. Ua ite Iehova i te reira.

Aita Esetera i ite a‘e i tera ture. Ua faatae atura Moredekai ia ’na i te hoê papai e faaara nei no nia i te ture e ua na ô oia: ‘A haere e paraparau i te arii.’ Ua parau atura Esetera: ‘Ia haere te taata i mua i te arii e aita te arii i titau ia ’na, e haapohehia tera taata. A 30 mahana i teie nei aita te arii i titau ia ’u! E haere râ vau e farerei ia ’na. Ia toro mai oia i ta ’na sepeta, e ora ïa vau. Ia ore oia e na reira, e pohe ïa vau.’

Ua tomo atura Esetera i roto i te aua o te arii. A ite ai te arii ia ’na, ua toro oia i ta ’na sepeta. Ua haere atura Esetera ia ’na ra e ua ani te arii: ‘Eaha ta ’u e nehenehe e rave no oe, Esetera e?’ Ua pahono oia: ‘Te hinaaro nei au e titau manihini ia oe e ia Hamana i  te hoê tamaaraa.’ I tera tamaaraa, ua titau faahou â Esetera ia raua i te tahi atu tamaaraa o te tupu i te mahana i muri iho. I te pitiraa o te tamaaraa, ua ani faahou te arii: ‘Eaha ta ’u e nehenehe e rave no oe?’ Ua pahono oia: ‘Te vai ra hoê taata o te opua nei i te haapohe ia ’u e i to ’u nunaa. A faaora mai na ia matou.’ Ua ani atura te arii: ‘O vai te hinaaro e haapohe ia oe?’ Ua na ô Esetera: ‘Teie taata ino mau o Hamana.’ Ua riri rahi atura Ahasueru e ua haapohe oia ia Hamana i taua iho â taime.

Tera râ, eita hoê a‘e taata e nehenehe e faaore i te ture a Hamana. Eita atoa te arii e nehenehe e na reira. No reira, ua horoa te arii ia Moredekai i te tiaraa no te aratai i te hui arii e no te haamau i te hoê ture apî. Ua haamau Moredekai i te ture o tei faatia i te nunaa ati Iuda ia paruru ia ratou iho a aro ai te mau enemi ia ratou. I te 13 no te ava‘e Adara, ua upootia te nunaa ati Iuda i nia i to ratou mau enemi. Mai tera mahana e i te matahiti taitahi, ua faatupu te nunaa ati Iuda i te hoê oroa no te haamana‘o i tera upootiaraa.

“E aratohia outou i mua i te mau tavana e te mau arii no ’u nei, ia ite hoi ratou e te feia o te mau nunaa ěê ia ’u.”—Mataio 10:18

No te ite atu â

VIDEO OMUARAA PARAU O TE MAU BUKA BIBILIA

Omuaraa parau o te buka Esetera

E haapuai te mau tupuraa peapea mau i te tau o Esetera i to oe faaroo i te aravihi o te Atua ra o Iehova no te faaora i to ’na nunaa i te mau ati i teie mahana.

A PEE I TO RATOU FAAROO

Ua turu Esetera i te nunaa o te Atua

E titau te here haapae ia ’na iho mai to Esetera i te faaroo e te itoito.

A PEE I TO RATOU FAAROO

Ua haa Esetera ma te paari, te itoito e te miimii ore

Mea nafea Esetera i turu ai ia Iehova e to ’na nunaa ma te miimii ore?