Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 36

Ta Iepheta i euhe

Ta Iepheta i euhe

Ua faarue faahou to Iseraela ia Iehova e ua haamata ratou i te haamori i te mau atua hape. Ua aro te feia no Amona ia Iseraela e ua pau to Iseraela. Aita roa ’tu to Iseraela mau atua hape i tauturu a‘e ia ratou. Ua mauiui to Iseraela e rave rahi matahiti i te maoro. Ua parau atura ratou ia Iehova: ‘Ua hara matou. A faaora mai na ia matou i te rima o to matou mau enemi.’ Ua haaparari to Iseraela i ta ratou mau idolo e ua haamata ratou i te haamori faahou ia Iehova. Aita Iehova i hinaaro ia tamau ratou i te mauiui.

Ua maitihia te hoê faehau, o Iepheta to ’na i‘oa, no te aratai i te nunaa no te aro i te feia no Amona. Ua parau Iepheta ia Iehova: ‘A tauturu mai ia matou ia upootia i roto i teie aroraa. E ia ho‘i au i te fare, e horoa ’tu vau ia oe i te taata matamua o te haere mai i rapae  i te fare no te farerei ia ’u.’ Ua faaroo Iehova i te pure a Iepheta e ua tauturu Oia ia ’na ia upootia i roto i teie aroraa.

I to Iepheta ho‘iraa i te fare, te taata matamua tei haere e farerei ia ’na, o ta ’na ïa tamahine otahi. Ua ori tera tamahine ma te tupaipai i te tophe. Eaha ta Iepheta i rave? Ua haamana‘o oia i ta ’na i euhe e ua parau oia: ‘Auê, ta ’u tamahine e! Ua mauiui roa vau. Ua euhe au ia Iehova. E no te tapea i te reira, e mea tia ia tono vau ia oe i te sekene i Silo no te tavini atu.’ Ua parau râ ta ’na tamahine: ‘Papa e, ua euhe oe ia Iehova e e mea tia ia tapea i tera euhe. Ta ’u noa e ani, ia haere au e to ’u mau hoa tamahine i te mou‘a e piti ava‘e i te maoro. I muri iho, e haere au i te sekene.’ Ua tavini te tamahine a Iepheta i te sekene ma te taiva ore i te roaraa o to ’na oraraa. I te matahiti taitahi, ua haere to ’na mau hoa e farerei ia ’na i Silo.

“Te taata mea here a‘e na ’na i ta ’na tamaiti aore ra tamahine ia ’u nei, e ore ïa e tia ia ’na ia riro ei pǐpǐ na ’u.”—Mataio 10:37