Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 79

Ua faatupu o Iesu i e rave rahi semeio

Ua faatupu o Iesu i e rave rahi semeio

Ua tonohia o Iesu i nia i te fenua nei no te faaite i te parau apî oaoa o te Faatereraa arii a te Atua. No te faaite eaha ta Iesu e rave ei Arii, ua horoa Iehova ia ’na i te varua mo‘a no te faatupu i te mau semeio. Ua nehenehe Iesu e faaora i te feia ma‘i. I te mau vahi atoa i haere ai oia, ua haere te mau taata e ani ia Iesu i te tauturu e ua faaore oia i to ratou mau ma‘i atoa. Ua nehenehe te matapo e ite faahou e te hapepa e haere faahou. Ua faaora atoa o Iesu i te feia tei uruhia e te demoni. Noa ’tu e ua tapea te taata i te hiti noa o to ’na ahu, ua orahia mai ratou. Ua pee te mau taata ia Iesu i te mau vahi atoa i haere ai oia. Noa ’tu e ua hinaaro Iesu e faafaaea o ’na ana‘e i te tahi taime, aita oia i tiahi i te tahi noa ’‘e taata.

I te hoê taime, ua afai mai te mau taata i te hoê hapepa i te hoê fare i reira Iesu. Ua î roa râ te fare i te taata e aita ratou i nehenehe e tomo atu. Ua faaapoo ihora ratou i te tapo‘i fare e ua haapou maira ratou i te hapepa ia Iesu ra. Ua parau atura Iesu i te taata: ‘A tia e a haere.’ Ua tia ’tura te hapepa e ua maere roa te mau taata.

I te tahi atu taime, ua haere Iesu i roto i te hoê oire iti. I te atea, i vai na ahuru tane lepera tei tuô atu: ‘E Iesu e, a tauturu mai na ia matou!’ I taua tau ra, aita i faatiahia i te feia lepera ia haere i pihai iho i te tahi atu mau taata. Ua parau Iesu i taua mau tane ra ia haere i te hiero. Ia au i te ture a Iehova, tera tei titauhia i te feia lepera ia rave i muri a‘e i to ratou faaoraraa. I to ratou haereraa i te hiero, ua ora roa to ratou ma‘i. I to ’na iteraa e ua ora roa oia, ua ho‘i mai hoê o na tane lepera  ahuru no te haamauruuru ia Iesu e no te arue i te Atua. Hoê noa ’‘e ïa i nia i tera ahuru taata tei haamauruuru ia Iesu.

Ua ma‘ihia te hoê vahine 12 matahiti i te maoro e ua mana‘o oia aita roa ’tu oia e ora mai. Tei rotopu o Iesu i te hoê nahoa. Ua haere atura te vahine i muri noa ia Iesu e ua tapea oia i te hiti o to Iesu ahu. I tera iho â taime, ua ora mai oia. I tupu na te reira, ua ani Iesu: “Na vai i tapea ia ’u?” Ua riaria roa te vahine. Noa ’tu râ, ua haere oia e faaite ia Iesu i ta ’na i rave. Ua tamahanahana Iesu ia ’na ma te parau e: ‘Ta ’u tamahine e, a haere, eiaha oe e haapeapea.’

Ua taparu te hoê ofitie, o Iaeiro to ’na i‘oa, ia Iesu: ‘A haere mai na i to ’u fare! E ma‘i rahi to ta ’u tamahine iti.’ Hou râ a tapae ai Iesu i to Iaeiro fare, ua pohe te tamahine. I to Iesu tapaeraa i te fare, ua ite oia e ua haere mai e rave rahi taata no te oto e te utuafare. Ua parau Iesu ia ratou: ‘Eiaha e ta‘i. Te taoto noa ra hoi te tamahine.’ Ua rave atura Iesu i te rima o te tamahine e ua parau: “Tamahine, a tia mai!” I taua iho â taime, ua ara te tamahine e ua parahi oia. Ua parau atura Iesu i to ’na na metua ia faatamaa ia ’na. A feruri na i te huru o to ’na na metua i taua taime ra!

“Ua faatavai te Atua ia ’na i te varua mo‘a e i te mana, e ua hamani maitai haere Iesu i te taata e ua faaora i te feia atoa i haavîhia e te Diabolo, no te mea tei ia ’na ra te Atua.”—Ohipa 10:38

No te ite atu â

IESU TE E‘A, TE PARAU MAU, TE ORA

“Ua faaorehia ta oe mau hara”

Eaha ta Iesu e faataa no nia i te hara e te ma‘i?

IESU TE E‘A, TE PARAU MAU, TE ORA

Oraraa te ma‘i i te tapearaa i to Iesu ahu

E faaite Iesu i to ’na mana e aumihi i roto i teie tupuraa o te tamahanahana mai.

IESU TE E‘A, TE PARAU MAU, TE ORA

Ora-faahou-raa mai te hoê tamahine!

E ata te taata ia Iesu no ta ’na parau e te taoto noa ra te tamahine tei pohe. Eaha ta ’na i ite aita ratou i ite?

IESU TE E‘A, TE PARAU MAU, TE ORA

Haamauruururaa hoê noa taata ua ora to ’na lepera ia Iesu

E haamauruuru te taata ua ora to ’na lepera ia Iesu, e ia vai atoa?

IESU TE E‘A, TE PARAU MAU, TE ORA

Semeio maoti to vai mana?

Ua mana‘o to Iesu mau teina e ua maamaahia oia.