Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 54

Ua faaite Iehova i te faaoromai ia Iona

Ua faaite Iehova i te faaoromai ia Iona

Mea ino mau te mau taata i Nineve, te hoê oire Asura. Ua parau Iehova i ta ’na peropheta, o Iona to ’na i‘oa, ia haere i Nineve e ia faaara i te nunaa ia taui i to ratou haerea. Tera râ, ua horo ê Iona no te haere i te hoê fenua atea roa ia Nineve. Ua haere oia na nia i te hoê pahi e ua tere oia i Taresisa.

A tere ai te pahi na nia i te miti, ua tupu mai te hoê vero puai. Ua riaria roa te mau ihitai. Ua pure atura ratou i to ratou mau atua ma te ani: ‘No te aha te reira e tupu ai?’ I te pae hopea, ua parau Iona ia ratou: ‘Na ’u te hape. Te horo ê nei au no te ore e rave i te ohipa ta Iehova i horoa mai. A taora ia ’u i roto i te miti e e mau te vero.’ Aita te feia ihitai i hinaaro e taora ia Iona i roto i te miti. Ua mârô râ o Iona. I to ratou taoraraa ia Iona, ua mau te vero.

Ua mana‘o Iona e e pohe oia. A paremo hohonu atu â ’i oia i roto i te miti, ua pure oia ia Iehova. Ua faaohipa ’tura Iehova i te hoê i‘a rarahi no te horomii ia Iona. Aita râ Iona i pohe. Mai roto mai i te opu o te i‘a, ua pure Iona: ‘Teie ta ’u euhe: e faaroo noa vau ia oe.’ Maoti Iehova, ua ora mai Iona i roto i te opu o te i‘a e toru mahana i te maoro e ua pihae te i‘a ia Iona i nia i te fenua.

Inaha ua faaora Iehova ia Iona, e tapao anei ïa te reira e eita Iona e haere faahou i Nineve? Aita roa ’tu. Ua parau faahou Iehova ia Iona ia haere i Nineve. I taua taime râ, ua faaroo Iona ia Iehova. Ua haere oia i ǒ e ua parau oia i te nunaa ino mau: ‘E 40 mahana te toe ra e e haamouhia  Nineve.’ Ua tupu atura râ te tahi ohipa maere mau: ua taui to Nineve i to ratou haerea. Ua parau te arii o Nineve i te nunaa: ‘A pure i te Atua e a tatarahapa. Peneia‘e eita oia e haamou ia tatou.’ Ua ite Iehova e ua tatarahapa mai tera nunaa. Aita ïa oia i haamou ia Nineve.

Ua riri roa Iona no te mea aita te oire i haamouhia. A feruri na: ua faaite Iehova i te faaoromai e i te aroha hamani maitai ia Iona. Aita râ Iona i na reira i nia i te nunaa no Nineve. Ua haere râ oia e parahi i rapaeau i te oire, i raro a‘e i te hoê raau tanu, te hoê kikiuna ïa. E ua amuamu oia. I muri iho, ua pohe te raau tanu e ua riri roa o Iona. Ua parau atura Iehova ia ’na: ‘Mea tapitapi a‘e oe no tera raau tanu i to Nineve. Ua faaite au i te aroha hamani maitai ia ratou e ua ora mai ratou.’ Eaha te haapiiraa? Mea faufaa a‘e to Nineve i te tahi noa ’‘e raau tanu.

“Mea faaoromai râ [Iehova] ia outou, no te mea aita oia e hinaaro ra ia haamouhia te hoê, te hinaaro nei râ ia noaa i te taata atoa te tatarahapa.”—Petero 2, 3:9