Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 50

Ua paruru Iehova ia Iehosaphata

Ua paruru Iehova ia Iehosaphata

Ua haaparari te arii no Iuda, o Iehosaphata, i te mau fata a Baala e i te mau idolo i vai na i te fenua. Ua hinaaro oia ia ite te nunaa i te mau ture a Iehova. Ua tono ïa oia i te mau hui arii e te ati Levi no te haapii atu i te nunaa o Iuda i te mau ture a Iehova.

Aita te mau nunaa i pihai iho i hinaaro e aro ia Iuda no te mea ua ite ratou e ua turu Iehova i to ’na nunaa. Ua tae roa ratou i te hapono i te mau tao‘a i te arii Iehosaphata. I muri iho râ, ua tamata to Amona, to Moabi e to Seira i te aro ia Iuda. Ua ite Iehosaphata e ua titauhia ia ’na te tauturu a Iehova. Ua haaputuputu mai oia i te mau tane, te mau vahine e te mau tamarii atoa i Ierusalema. I mua ia ratou pauroa, ua pure oia: ‘E Iehova e, eita matou e upootia eita ana‘e oe e tauturu mai. A faaite mai na eaha te rave.’

Ua pahono Iehova i ta ’na pure: ‘Eiaha e mǎta‘u. E tauturu vau ia outou. A tia noa mai e a hi‘o e nafea vau e faaora ia outou.’ E nafea Iehova i faaora ’i ia ratou?

I te poipoi i muri iho, ua maiti Iehosaphata i te feia himene e ua parau atu ia haere i mua roa i te nuu. Mea na avae mai ratou mai Ierusalema e tae atu i te vahi aroraa, parauhia Tekoa.

A himene ai te feia himene no te arue ia Iehova ma te oaoa e ma te reo puai, ua aro Iehova no to ’na nunaa. Ua faatupu oia i te arepurepu i rotopu i to Amona e to Moabi. Ua haamata ’tura ratou i te aro te tahi i te tahi e aita hoê a‘e i ora mai. Ua paruru râ Iehova i te nunaa o Iuda, te mau faehau e te mau tahu‘a. Ua ite i te mau nunaa atoa i pihai iho eaha ta Iehova i rave e ua taa ia ratou e te paruru noâ nei Iehova i to ’na nunaa. E nafea Iehova e faaora ’i i to ’na nunaa? Maoti e rave rau ravea. No te na reira, eita e titauhia ia Iehova te tauturu a te taata.

“E ore outou e aro i tena na, e haamau outou, e tia noa mai, e hi‘o i te ora na Iehova e horoa mai na outou.”—Paraleipomeno 2, 20:17