Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 55

Ua paruru te melahi a Iehova ia Hezekia

Ua paruru te melahi a Iehova ia Hezekia

Ua haru te Hau emepera o Asura i te faatereraa arii o na opu ahuru o Iseraela. I muri iho, ua hinaaro Senakeriba, te arii o Asura, e haru i te faatereraa arii o na opu e piti o Iuda. Ua haamata oia i te haru mai i te oire taitahi o Iuda, hoê oire i muri a‘e i te tahi. Te oire râ ta ’na i hinaaro rahi roa ’‘e, o Ierusalema ïa. Aita Senakeriba i mana‘o a‘e e te paruru nei Iehova ia Ierusalema.

Ua aufau atu o Hezekia, te arii o Iuda, i e rave rahi moni ia Senakeriba ia ore oia e haru ia Ierusalema. Tera râ, noa ’tu e ua fana‘o Senakeriba i te moni, ua tono oia i ta ’na nuu puai mau no te aro ia Ierusalema. Ua riaria roa te feia o tera oire no te mea te haafatata ’tu â ra to Asura ia Ierusalema. Ua parau atura Hezekia ia ratou: ‘Eiaha e mǎta‘u. Mea puai to Asura, mea puai a‘e râ tatou ia ratou maoti Iehova.’

Ua tono Senakeriba i ta ’na vea, o Rabasake, i Ierusalema no te faaooo i te nunaa. Ua vai Rabasake i rapaeau i te oire e ua tuô oia: ‘Eita Iehova e nehenehe e tauturu ia outou. Eiaha e vaiiho ia Hezekia ia haavare ia outou. Eita hoê a‘e atua o te nehenehe e paruru ia outou i to matou rima.’

Ua ani atura Hezekia ia Iehova eaha te rave. Ua pahono Iehova: ‘Eiaha e mǎta‘u no ta Rabasake i parau. Eita Senakeriba e haru ia Ierusalema.’ I muri iho, ua hapono Senakeriba i te tahi mau rata ia Hezekia. Ua papai oia: ‘Faaea i te patoi mai. Eita Iehova e nehenehe e faaora ia outou.’ Ua pure Hezekia: ‘E Iehova e, a faaora mai na ia matou, ia nehenehe te mau taata atoa e ite e o oe ana‘e te Atua mau.’ Ua parau atura Iehova ia ’na: ‘Eita te arii no Asura e tomo i roto ia Ierusalema. E paruru vau i to ’u oire.’

Ua papu ia Senakeriba e e haru oia ia Ierusalema. Tera râ, i taua po ra, ua tono Iehova i te hoê melahi i te vahi i rapaeau  i te oire, i reira te mau faehau i puhapa ’i. Ua haapohe taua melahi ra e 185 000 faehau! Ua ere te arii Senakeriba i ta ’na mau faehau puai roa ’‘e. Aita e ravea faahou no ’na. Ua ho‘i oia i to ’na fenua inaha ua pau oia. Ua paruru Iehova ia Hezekia e ia Ierusalema, mai ta ’na i fafau. Mai te peu e tei Ierusalema oe i taua tau ra, e tiaturi anei oe ia Iehova?

“Te patia nei te melahi a Iehova i te puhapa e ati noa ’‘e i te feia i mǎta‘u ia ’na, e ua faaora ia ratou.”—Salamo 34:7