Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 38

Maoti Iehova i puai mai ai Samasona

Maoti Iehova i puai mai ai Samasona

E rave rahi taata no Iseraela tei haamori faahou i te mau idolo. Ua vaiiho ïa Iehova i to Philiseti ia faatere i to Iseraela fenua. Tera râ, i vai na vetahi mau taata no Iseraela tei here ia Iehova. O Manoa ïa, hoê o ratou. Aita e tamarii ta Manoa e ta ta ’na vahine. I te hoê mahana, ua tono Iehova i te hoê melahi no te farerei i te vahine a Manoa. Ua parau te melahi ia ’na: ‘E fanau oe i te hoê tamaiti. E faaora oia i to Iseraela i te rima o to Philiseti. E riro oia ei Nazira.’ Ua ite anei oe o vai te mau Nazira? E mau tavini taa ê ïa a Iehova. Aita te mau Nazira i faatiahia ia tâpû i to ratou rouru.

I muri iho, ua fanau te vahine a Manoa i te hoê tamaiti, o Samasona to ’na i‘oa. A paari ai Samasona, ua riro oia ei taata puai roa maoti Iehova. Ua nehenehe oia e haapohe i te hoê liona ma te faaohipa noa i to ’na na rima. I te tahi taime, ua haapohe o Samasona ana‘e e 30 Philiseti. Ua riri roa to Philiseti ia ’na e ua tamau ratou i te imi i te ravea no te haapohe ia ’na. I te hoê po, a taoto ai Samasona i Gaza, ua haere ratou i te uputa o te oire e ua tiai ratou i te poipoi no te haapohe ia Samasona. Tera râ, i te tuiraa po, ua tia Samasona, ua haere oia i te uputa o te oire e ua tatara oia i te opani mai te patu ra. Ua amo oia i te opani i nia i to ’na tapono e tae roa ’tu i nia roa i te mou‘a i pihai iho ia Heberona!

I muri a‘e, ua haere to Philiseti e farerei i te hoa vahine o Samasona, o Delila to ’na i‘oa. Ua na ô ratou: ‘E aufau matou taitahi ia oe e tausani moni ario. Ia faaite mai râ oe no te aha mea puai roa o Samasona. Te hinaaro nei matou e haru ia ’na no te tuu ia ’na i roto i te fare tapearaa.’ Ua hinaaro Delila i te moni. Ua farii ïa oia i te faaauraa. I te omuaraa, aita Samasona i parau ia ’na nohea mai to ’na puai. Tera râ, ua mârô Delila tae roa ’tu i te taime i parau ai Samasona i ta ’na i ore roa ’tu i faaite a‘enei. Ua parau atu Samasona: ‘Aita roa ’tu to ’u rouru i tâpûhia no te mea e Nazira vau. Ia tâpûhia to ’u rouru, e ere au i to ’u puai.’ Ua hape roa Samasona i te faaiteraa ’tu i te reira, e ere anei?

Oioi Delila i te parau i to Philiseti: ‘Ua ite au nohea mai to ’na puai!’  Ua faataoto oia ia Samasona i nia i to ’na turi e i muri iho ua ani oia ia tâpûhia to Samasona rouru. Tuô atura Delila: ‘Samasona, era ’tu to Philiseti!’ Ara ’tura Samasona e ua ere oia i to ’na puai. Ua rave atura to Philiseti ia Samasona e ua haamatapo ratou ia ’na hou a tuu ai ia ’na i te fare tapearaa.

I te hoê mahana, ua putuputu mai e tausani Philiseti i te hiero o to ratou atua o Dagona. Ua tuô ratou: ‘Maoti to matou atua, ua tapeahia Samasona! Afai mai ia Samasona! E faaooo ana‘e ia ’na.’ Ua tuu ratou ia Samasona i ropu i na pou e piti e ua faaooo ratou ia ’na. Ua pure atura Samasona: ‘E Iehova e, a horoa faahou mai na i te puai.’ Tupu atura te rouru o Samasona. Ua tapea oia i te mau pou o te hiero e ua turai oia i te reira ma to ’na puai atoa. Ua parari te hiero taatoa e ua topa te reira i nia i te mau taata atoa i roto i te hiero. Ua pohe ratou pauroa, oia atoa o Samasona.

“E puai to ’u ia faaruru i te mau mea atoa maoti tei horoa mai i te puai.”—Philipi 4:13