Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 75

Ua tamata te Diabolo ia Iesu

Ua tamata te Diabolo ia Iesu

I muri a‘e i to Iesu bapetizoraa, ua aratai te varua mo‘a ia ’na i te medebara. Aita oia i tamaa a‘e e 40 mahana i te maoro e ua poia roa oia. Ua haere atura te Diabolo ia Iesu ra no te tamata ia ’na e ua parau atu oia: ‘Mai te peu e e Tamaiti iho â oe na te Atua, a parau i tera mau ofai ia riro mai ei faraoa.’ Ua pahono râ o Iesu ma te faahiti i te mau Papai: ‘Ua papaihia e eita e navai noa te maa no te ora. E titauhia ra ia faaroo i te mau parau atoa a Iehova.’

I muri iho, ua ‘a‘a te Diabolo ia Iesu: ‘Mai te peu e e Tamaiti iho â oe na te Atua, a ou‘a i raro i te vahi teitei roa o te hiero. Ua papaihia hoi e e tono te Atua i ta ’na mau melahi no te haru ia oe.’ Ua faahiti faahou â râ o Iesu i te mau Papai a na ô ai e: ‘Ua papaihia e eiaha oe e ‘a‘a ia Iehova.’

I muri iho, ua faaite o Satani ia Iesu i te mau faatereraa atoa o teie ao, ta ratou mau tao‘a e to ratou hanahana. Ua parau oia: ‘E horoa ’tu vau ia oe i teie mau faatereraa atoa e to ratou hanahana mai te peu e e haamori oe ia ’u hoê noa taime.’ Ua pahono atura râ o Iesu: ‘A haere ê oe, Satani! Ua papaihia e o Iehova ana‘e ta oe e haamori.’

I muri iho, ua haere ê te Diabolo e ua haere mai te mau melahi ia Iesu ra no te horoa ’tu i te maa. Mai tera taime mai â, ua poro Iesu i te parau oaoa o te Faatereraa arii. Ua tonohia mai oia i nia i te fenua no te rave i tera ohipa. Mea au roa na te mau taata ta Iesu mau haapiiraa e ua pee ratou ia ’na i te mau vahi atoa.

“E parau [te Diabolo] i te haavare no te mea mai tera iho â o ’na, e haavare e te metua no te haavare.”—Ioane 8:44