A afai ai Nebukanesa i te hui arii o Iuda i Babulonia, ua maiti oia i te hoê taata toroa, o Asepenaza to ˈna iˈoa, no te haapao ia ratou. Ua parau Nebukanesa ia Asepenaza ia rave i te mau taurearea maramarama roa ˈˈe e mea maitai roa ˈˈe to ratou ea. E faaineinehia teie mau taurearea e toru matahiti i te maoro no te riro ei feia toroa i Babulonia. E mea tia i te mau taurearea ia haapii i te taio, i te papai e i te paraparau na roto i te reo Akada tei paraparauhia i Babulonia. E mea titau-atoa-hia ia ratou ia amu i te hoê â maa i ta te arii e to ˈna mau tia mana. Tei roto o Daniela, Hanania, Misaela e o Azaria i tera pǔpǔ taurearea. Ua horoa Asepenaza ia ratou i te mau iˈoa Babulonia: O Beletesazara, Sadaraka, Meseka e o Abedenego. E turai anei teie faaineineraa ia ratou ia faaea i te tavini ia Iehova?

 Ua faaoti papu teie na taurearea e maha ia faaroo ia Iehova. Ua ite ratou e mea ino ia amu i te hoê â maa i ta te arii no te mea ia au i te Ture a te Atua, mea viivii te tahi o tera mau maa. Ua taparu ïa ratou ia Asepenaza: ‘Eiaha e faahepo ia matou ia amu i te hoê â maa i ta te arii.’ Ua parau atu Asepenaza: ‘Mai te peu e eita outou e amu i te reira, e manaˈo te arii e e maˈi to outou e e haapohe oia ia ˈu!’

Ua puta mai te hoê manaˈo i roto i to Daniela feruriraa. Ua parau oia i to ratou taata tiai: ‘A tamata na hoê ahuru mahana, a horoa mai i te maa tupu e te pape. I muri iho, e faaau oe i to matou hohoˈa e to te mau taurearea tei amu i te maa a te arii.’ Ua farii te taata tiai.

Ua oti te tamataraa e ahuru mahana i te maoro. Mea oraora maitai aˈe Daniela e to ˈna na hoa e toru i te tahi atu mau taurearea. Ua oaoa Iehova no te mea ua faaroo ratou ia ˈna. Ua horoa atoa te Atua i te paari ia Daniela ia nehenehe oia e taa i te mau orama e te mau moemoeâ.

A hope ai te faaineineraa, ua afai Asepenaza i te mau taurearea i mua ia Nebukanesa. Ua paraparau te arii ia ratou e ua ite ia ˈna e o Daniela, Hanania, Misaela e o Azaria te mau taurearea maramarama roa ˈˈe e te aravihi roa ˈˈe. Ua maiti te arii ia ratou e maha no te ohipa i roto i to ˈna aorai. E pinepine te arii i te ani i to ratou manaˈo no nia i te mau ohipa faufaa. Maoti Iehova, mea paari aˈe tera mau taurearea e maha i te mau taata paari atoa a te arii e ta ˈna feia tahutahu.

Noa ˈtu tei te hoê fenua ê ratou, aita i moˈe ia Daniela, Hanania, Misaela e ia Azaria e e tavini ratou na Iehova. E o oe, e haamanaˈo noa anei oe ia Iehova, noa ˈtu eita to oe na metua i pihai iho ia oe?