Eaha to roto?

Tapura tumu parau

 HAAPIIRAA 68

Ua fanau o Elisabeta

Ua fanau o Elisabeta

Hau atu 400 matahiti i muri iho i te patu-faahou-raa i te mau patu o Ierusalema, i vai na te hoê tahuˈa, o Zekaria to ˈna iˈoa, e ta ˈna vahine, o Elisabeta. Ua ora raua i pihai iho i te oire. Ua faaipoipo raua e rave rahi matahiti i te maororaa e aita raua i tamariihia. I te hoê mahana, a pûpû ai Zekaria i te mea noˈanoˈa i te vahi haamoriraa o te hiero, ua fa mai te melahi o Gaberiela. Ua riaria roa o Zekaria. Ua parau râ o Gaberiela: ‘Eiaha e riaria. E parau apî oaoa ta ˈu no ô mai ia Iehova. E fanau mai ta oe vahine o Elisabeta i te hoê tamaiti. O Ioane to ˈna iˈoa. Ua maiti Iehova ia Ioane no te rave i te hoê ohipa taa ê.’ Ua ani atura Zekaria: ‘E nafea vau e nehenehe ai e tiaturi ia oe? Mea ruau roa o Elisabeta no te fanau i te tamarii. Mea ruau atoa vau.’ Ua parau atura Gaberiela: ‘Na te Atua i tono ia ˈu no te faaite i tera parau apî. Inaha râ aita oe e tiaturi ra ia ˈu, eita oe e paraparau faahou e tae roa ˈtu i te fanauraa o te aiû.’

Ua vai maoro aˈe o Zekaria i roto i te vahi haamoriraa. Ua tiai noa te mau taata i rapae. I te taime iho â i haere ai oia i rapae, ua hinaaro ratou e ite eaha tei tupu. Aita râ o Zekaria i nehenehe e paraparau. Ua nehenehe noa oia e hautiuti i to ˈna na rima no te faataa ˈtu eaha tei tupu. Ua taa ˈtura i te mau taata e ua faatae te Atua i te hoê poroi ia Zekaria.

I muri iho, ua hapû mai o Elisabeta e ua fanau oia i te hoê tamaiti, mai ta te melahi i parau na. Ua haere mai to ˈna mau hoa e fetii e hiˈo i te aiû. Ua oaoa roa ratou no ˈna. Ua parau Elisabeta: ‘O Ioane to ˈna iˈoa.’ Ua na ô râ ratou: ‘Aita hoê aˈe fetii i roto i to oe utuafare tei piihia Ioane. A pii ia ˈna Zekaria, mai to ˈna metua tane.’ Ua papai râ o Zekaria i tera parau: ‘O Ioane to ˈna iˈoa.’ I tera iho â taime, ua nehenehe Zekaria e paraparau faahou! Ua ite te feia atoa no Iudea i te parau apî no nia i te aiû e ua manaˈo te taata: ‘Eaha ta teie aiû e rave i to ˈna paariraa mai?’

Ua î aˈera o Zekaria i te varua moˈa. Ua tohu oia: ‘Ia faahanahanahia o Iehova! Ua fafau oia ia Aberahama e  e tono Oia i te Mesia no te faaora ia tatou. E riro o Ioane ei peropheta e e faaineine oia i te eˈa no te Mesia.’

Ua tupu te tahi atu â ohipa taa ê i nia ia Maria, te hoê fetii o Elisabeta. E ite ïa tâua no nia i te reira i to muri nei haapiiraa.

“I te taata, e ore e tia. I te Atua râ, e tia ïa te mau mea atoa.”—Mataio 19:26