Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 47

Ua faaitoito Iehova ia Elia

Ua faaitoito Iehova ia Elia

Ua ite ia Iezebela eaha tei tupu i nia i te mau peropheta a Baala e ua riri roa oia. Ua faatae oia i te hoê poroi ia Elia: ‘Ananahi, e pohe oe mai te mau peropheta a Baala.’ Ua riaria roa o Elia e ua horo ê oia no te haere i te medebara. Ua pure oia: ‘E Iehova e, ua oti roa vau. Ia pohe au!’ No to ’na rohirohi, ua taoto Elia i raro a‘e i te hoê tumu raau.

Ua faaara ’tu te hoê melahi ia ’na e ua parau oia ma te mǎrû: ‘A tia e a tamaa.’ Ua ite Elia i te hoê pane iti tunuhia i nia i te arahu e i te hoê farii pape. Ua amu e ua inu oia i te reira. Ia oti, ua haere atura oia e taoto. Ua faaara faahou te melahi ia ’na e ua parau atu: ‘A tamaa. Ia puaihia oe no to oe tere.’ Ua tamaa faahou Elia. I muri iho, ua tere oia e 40 ao e e 40 po no te haere i te mou‘a Horeba. I to ’na tapaeraa i reira, ua haere Elia e taoto i roto i te hoê ana. Ua paraparau râ Iehova ia ’na, a na ô ai: ‘Eaha ta oe e rave ra i ǒ nei, Elia?’ Ua pahono atura Elia: ‘Aita to Iseraela i tapea i ta ratou i euhe ia oe. Ua haaparari ratou i ta oe mau fata e ua haapohe ratou i ta oe mau peropheta. I teie nei, te tamata nei ratou i te haapohe ia ’u.’

Ua parau atura Iehova ia ’na: ‘A haere e a tia i nia i te mou‘a.’ I te omuaraa, ua puhipuhi puai te mata‘i i rapaeau i te ana. I muri iho, ua aueue te fenua e ua itehia te auahi. I te pae hopea, ua faaroo Elia i te hoê reo iti haihai. Ua faaohipa oia i to ’na ahu no te paruru i to ’na na mata e ua vai oia i rapaeau i te ana. Ua ani atura Iehova ia ’na e no te aha oia i horo ê ai. Ua pahono Elia: ‘O vau ana‘e te toe ra.’ Tera râ ua parau Iehova ia ’na: ‘E ere roa ’tu o oe ana‘e. E 7 000 taata i Iseraela o te haamori noâ nei ia ’u. A haere ia Elisaia ra e a faatoroa ia ’na ei peropheta no te mono ia oe.’ Ua haere oioi Elia e rave i ta Iehova i parau ia ’na. A feruri na: Mai te peu e rave oe i ta Iehova e hinaaro ra, e tauturu atoa anei oia ia oe? Papu maitai e, e. E hi‘o ana‘e tâua eaha tei tupu i te tau pa‘urâ.

“Eiaha ïa e haapeapea noa ’‘e, na roto râ i te pure e te taparuparuraa e te haamaitairaa, a faaite i ta outou mau aniraa i te Atua.”—Philipi 4:6

No te ite atu â

A HAAPII I TO TAMARII

Ua riaria e ua mana‘o ê na anei oe e o oe ana‘e?

A mana‘o ai Elia e o ’na ana‘e, eaha ta Iehova i parau atu? Eaha te haapii mai i te huru o Elia?

A PEE I TO RATOU FAAROO

Ua tamahanahanahia Elia e to ’na Atua

Eaha tei tupu i toaruaru roa ’i Elia, a ani atu ai ia pohe o ’na?