Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 92

Ua fa mai o Iesu i te feia ravaai

Ua fa mai o Iesu i te feia ravaai

Tau taime i muri a‘e i to Iesu faraa ’tu i te mau aposetolo, ua faaoti o Petero i te haere e tai‘a i te miti o Galilea. Ua apiti atoa mai o Toma, Iakobo, Ioane e te tahi atu mau pǐpǐ. Ua tai‘a ratou i te po taatoa e aita hoê a‘e i‘a tei noaahia mai.

I te poipoi roa i muri iho, ua ite ratou i te hoê taata tei tia i tahatai. Ua tuô tera taata ia ratou: ‘Ua noaa anei ia outou maa i‘a?’ Ua pahono ratou ia ’na: “Aita!” Ua parau atura te taata: “A taora i te upe‘a i te pae atau o te poti.” A na reira ’i, ua î roa mai te upe‘a i e rave rahi i‘a e aita i haere ia ratou ia huti i te reira. Ua taa ’tura ia Ioane e o Iesu tera taata e ua na ô oia: “O te Fatu!” Oioi Petero i te ou‘a i roto i te miti e i te ǎu no te haere i tahatai. Ua apee te tahi atu mau pǐpǐ ia ’na na nia i te poti.

I to ratou taeraa ’tu i tahatai, ua ite ratou i te faraoa e te i‘a e ama ra. Ua parau Iesu ia ratou ia afai mai maa i‘a tei noaahia no te tunu atu. I muri iho, ua parau oia: ‘A haere mai e tamaa.’

 I muri a‘e i to ratou tamaaraa, ua ani o Iesu ia Petero: ‘Mea here anei na oe ia ’u hau a‘e i te ohipa ravaai?’ Ua pahono atura o Petero: ‘E, e te Fatu, ua ite oe e mea here na ’u ia oe.’ Ua parau atura o Iesu: ‘A faaamu ïa i ta ’u mau fanau‘a mamoe.’ Ua ani faahou â o Iesu: ‘Petero, mea here anei na oe ia ’u?’ Ua pahono atura o Petero: ‘E te Fatu, ua ite oe e mea here na ’u ia oe.’ Ua na ô atura Iesu: “A aupuru i ta ’u mau fanau‘a mamoe.” I te toruraa o te taime, ua ui faahou o Iesu i taua noâ uiraa. Ua oto ihora o Petero e ua parau atu: ‘E te Fatu, ua ite oe i te mau mea atoa. Ua ite oe e mea here na ’u ia oe.’ Ua na ô atura o Iesu: “A faaamu i ta ’u mau fanau‘a mamoe.” I muri iho, ua faaue oia ia Petero: “A pee noa mai ia ’u.”

“Na ô atura [Iesu] ia raua: ‘A pee mai ia ’u, e faariro vau ia orua ei ravaai taata.’ I reira iho, vaiiho a‘era raua i ta raua upe‘a, e pee maira ia ’na.”—Mataio 4:19, 20

No te ite atu â

A PEE I TO RATOU FAAROO

Ua aro Petero i te mǎta‘u e te feaa

Mea ino roa ia feaa. Ua haavî râ Petero i to ’na mǎta‘u e to ’na feaa e pee ia Iesu.