Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 18

Te pu aihere tei ura mai

Te pu aihere tei ura mai

Ua ora Mose i Midiana e 40 matahiti i te maoro. Ua faaipoipohia e ua tamariihia oia. I te hoê mahana, a haapao ai oia i ta ’na mau mamoe i pihai iho i te Mou‘a Sinai, ua ite oia i te hoê ohipa maere mau. Ua ura te hoê pu aihere e aita roa ’tu te reira i ama mai! Haere atura Mose i pihai iho i te reira no te ite eaha te tupu ra. Faaroo atura oia i te hoê reo no ô mai i te pu aihere o tei parau: ‘Mose! Eiaha e piri atu â. A tatara i to oe na tiaa no te mea tei te hoê vahi mo‘a ra oe.’ O Iehova tei paraparau ia ’na maoti te hoê melahi.

Ua riaria Mose, no reira oia i tapo‘i ai i to ’na hoho‘a. Ua na ô te reo: ‘Ua ite au e te mauiui ra to Iseraela. E faatiamâ vau ia ratou i te faatîtîraa a to Aiphiti e e aratai au ia ratou i te hoê fenua maitai. Na oe e faatere i to ’u nunaa i rapaeau ia Aiphiti.’ Ua maere roa paha Mose, e ere anei?

Ua ani Mose: ‘Eaha ta ’u e pahono ia ani mai te nunaa o vai tei tono ia ’u?’ Na ô atura te Atua: ‘A parau atu e na Iehova i tono ia oe. Oia te Atua o Aberahama, te Atua o Isaaka e te Atua o Iakoba.’ Parau atura Mose: ‘Nafea ïa vau ia ore te nunaa e faaroo ia ’u?’ Ua horoa Iehova ia Mose i te haapapuraa e e tauturu iho â Oia ia ’na. Ua parau oia ia Mose ia taora i ta ’na raau i raro. Riro atura te raau ei ophi! A tapea ’i Mose i te aero o te ophi, riro faahou atura te reira ei raau. Ua parau Iehova: ‘A faatupu ai oe i tera semeio, e haapapu te reira e na ’u iho â i tono ia oe.’

Parau atura Mose: ‘E ere au i te hoê taata orero maitai.’ Fafau atura Iehova ia ’na: ‘Na ’u e faaite ia oe eaha ta oe e parau atu. E tono atoa vau i to oe taeae o Aarona no te tauturu ia oe.’ A ite ai e e tauturu Iehova ia ’na, rave atura Mose i ta ’na vahine e i ta ’na mau tamarii no te ho‘i i Aiphiti.

“Eiaha e haapeapea eaha ta outou e parau aore ra e nafea, no te mea e faaitehia ’tu ta outou e parau i taua hora ra.”—Mataio 10:19