Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 29

Ua maiti Iehova ia Iosua

Ua maiti Iehova ia Iosua

Ua aratai Mose i te nunaa o Iseraela e rave rahi matahiti i te maoro. Fatata râ Mose i te pohe. Ua parau Iehova ia ’na: ‘Eita oe e aratai i to Iseraela i te Fenua tǎpǔhia. E vaiiho râ vau ia oe e ite i tera fenua.’ Ua ani atura Mose ia Iehova ia maiti i te hoê taata aratai apî no te haapao i te nunaa. Ua parau Iehova ia ’na: ‘A haere e farerei ia Iosua e a parau atu e o oia tei maitihia.’

Ua parau Mose i te nunaa e fatata oia i te pohe e ua maiti Iehova ia Iosua no te aratai ia ratou i te Fenua tǎpǔhia. Ua parau atura Mose ia Iosua: ‘Eiaha e mǎta‘u. E tauturu Iehova ia oe.’ I muri iho, ua haere Mose i nia i te mou‘a Nebo. I reira Iehova i faaite ai ia ’na i te fenua ta ’Na i tǎpǔ ia Aberahama, Isaaka e Iakoba. E 120 matahiti to Mose i to ’na poheraa.

Ua parau Iehova ia Iosua: ‘A haere na roto i te anavai Ioridana no te tae atu i Kanaana. E tauturu vau ia oe mai ta ’u i rave no Mose. A taio i te Ture ta ’u i horoa ia Mose i te mau mahana atoa. Eiaha e mǎta‘u. A itoito. A haere e a rave i ta ’u i faaue ia oe.’

 Ua tono Iosua i e piti taata hi‘o no te hi‘o haere i te oire o Ieriko. I to muri nei aamu, e ite atu â taua eaha tei tupu i ô. A ho‘i ai na taata hi‘o e piti, ua faatia ratou e e taime tano tera no te haere i Kanaana. I te mahana i muri iho, ua parau Iosua i te nunaa ia faarue i te puhapa. Ua tono atura oia i te mau tahu‘a tei amo i te afata faufaa na mua roa na roto i te anavai Ioridana. Mea puai te pape i te anavai. Tera râ, i te taime te avae o te mau tahu‘a i haere ai i roto i te pape, ua mǎrô atura te anavai! Ua haere te mau tahu‘a na nia i te e‘a o te anavai e ua vai ratou i ô ia nehenehe te nunaa Iseraela e haere i te tahi atu pae o te anavai. No oe, maoti teie semeio, ua haamana‘o anei ratou i ta Iehova i rave i te miti Uteute?

I te pae hopea, i muri a‘e i taua mau matahiti atoa, ua tapae to Iseraela i te Fenua tǎpǔhia. Ua nehenehe ratou e patu i te mau fare e i te mau oire. Ua nehenehe ratou e faaapu e e tanu i te mau ô vine, oia atoa i te mau maa hotu. Mea rahi te mau mea maitai ta te taata i nehenehe e amu e e inu i te Fenua tǎpǔhia. No reira i parauhia ’i e e fenua e tahe noa mai te û e te meli.

“Na Iehova e aratai tamau ia oe ra, e na ’na e haamâhâ i to varua i te poihâ rahi ra.”—Isaia 58:11