Ua faahepohia to Iseraela ia ohipa ei tîtî. Ua tono Iehova ia Mose e ia Aarona no te farerei ia Pharao ma te parau: ‘A tuu i to ˈu nunaa ia haamori ratou ia ˈu i roto i te medebara.’ Ma te teoteo, pahono atura Pharao: ‘E ere roa ˈtu i te ohipa na ˈu ta Iehova i parau. Eita vau e tuu ia Iseraela ia haere.’ Ua faateimaha ˈtu â Pharao i ta ratou ohipa. E horoa ïa Iehova ia Pharao i te tahi haapiiraa. Ua ite anei oe ua nafea Iehova? Ua faatupu oia i na ati ahuru i Aiphiti. Ua parau Iehova ia Mose: ‘Aita Pharao e faaroo ra ia ˈu. I te poipoi, e haere oia i te anavai Nile. A haere atoa oe e a parau atu e inaha aita oia i vaiiho i to ˈu nunaa ia haere ê atu, e riro te pape atoa o te anavai Nile ei toto.’ Ua faaroo Mose ia Iehova e ua haere oia e farerei ia Pharao. Hiˈo noa ˈtura Pharao ia Aarona o tei tairi i te anavai Nile e ta ˈna raau. Riro atura te anavai ei toto. Pohe atura te mau iˈa, haamata ˈtura te anavai i te hauˈa ino e aita faahou i nehenehe e inu i te pape o te anavai. Noa ˈtu râ, tamau noa â Pharao i te patoi ia haere to Iseraela.

 Hitu mahana i muri iho, ua tono faahou Iehova ia Mose no te farerei ia Pharao ma te parau: ‘Eita anaˈe oe e vaiiho i to ˈu nunaa ia haere, e î roa mai Aiphiti i te mau rana.’ Aita râ Pharao i vaiiho i to Iseraela ia haere. Tuu atura Aarona i ta ˈna raau i nia e haamata ˈtura te fenua i te î roa mai i te mau rana. E rana i te mau vahi atoa: I roto i te mau fare, i nia i te mau roˈi e i roto i te mau farii maa! Ani atura Pharao ia Mose ia taparu ia Iehova ia faaea te ati. Ua euhe Pharao e e vaiiho oia i to Iseraela ia haere ê atu. Faaea ˈtura Iehova i te ati e haaputu atura to Aiphiti i te rana pohe e rave rahi roa. Haamata ˈtura te fenua i te hauˈa ino. Tera râ, ua patoi faahou â Pharao i te vaiiho i te nunaa ia haere.

I muri iho, ua parau Iehova ia Mose: ‘Ia tairi Aarona i te fenua e ta ˈna raau. E riro te repo fenua ei naonao.’ Aita i maoro, e naonao i te mau vahi atoa. Ua parau vetahi no Aiphiti ia Pharao: ‘E ati tera no ǒ mai i te Atua.’ Tera râ, aita iho â Pharao i vaiiho i to Iseraela ia haere.