Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 56

Mea au roa na Iosia te Ture a te Atua

Mea au roa na Iosia te Ture a te Atua

Ua riro Iosia ei arii no Iuda i te va‘uraa o to ’na matahiti. I tera tau, ua rave te nunaa i te peu tahutahu e ua haamori ratou i te mau idolo. I te 16raa o to Iosia matahiti, ua tamata oia i te haapii e nafea ia haamori ia Iehova ma te tano. I te 20raa o to ’na matahiti, ua haamata Iosia i te haaparari i te mau idolo e i te mau fata i te fenua atoa. I te 26raa o to ’na matahiti, ua faanaho te arii i te ohipa ia tataîhia te hiero o Iehova.

Ua ite te tahu‘a rahi, o Hilikia to ’na i‘oa, i te otaro o te Ture a Iehova i roto i te hiero. O te otaro iho â paha ta Mose i papai. I muri iho, ua afai te papai parau a te arii, o Saphana to ’na i‘oa, i te otaro ia Iosia e ua haamata oia i te taio i te Ture i te arii. A faaroo ai Iosia i te reira, ua taa ia ’na e ua faaroo ore noa te nunaa ia Iehova e rave rahi matahiti. Ua na ô te arii Iosia ia Hilikia: ‘Ua riri roa Iehova ia tatou. A haere e pure ia ’Na. E faaite mai Iehova eaha te tia ia tatou ia rave.’ Maoti te peropheta vahine, o Hulada to ’na i‘oa, ua pahono mai Iehova, a na ô ai: ‘Ua faarue te nunaa o Iuda ia ’u. E faautuahia ratou, eiaha râ i to Iosia ariiraa no te mea ua faaite oia i te haehaa.’

I to Iosia faarooraa i tera poroi, ua haere oia i te hiero e ua haaputuputu oia i te nunaa o Iuda. I muri iho, ua taio te arii i te Ture a Iehova i te nunaa atoa. Ua euhe Iosia e te nunaa i te faaroo ia Iehova ma to ratou aau atoa.

E rave rahi matahiti aita te nunaa o Iuda i faatupu i te oroa Pasa. I to Iosia râ taioraa i roto i te Ture i te faufaaraa ia faatupu i te oroa Pasa i te  mau matahiti atoa, ua parau oia i te nunaa: ‘E faatupu tatou i te oroa Pasa na Iehova.’ Ua faanaho ïa o Iosia ia pûpûhia e rave rahi tusia e ua ani oia ia haere mai te tahi pǔpǔ himene no te himene i te hiero. Ua faatupu atura te nunaa i te oroa Pasa e, i muri iho, i te Oroa o te pane faahopue ore e va‘u mahana i te maoro. Aita i itea i te hoê oroa Pasa mai teie mai te tau o Samuela mai â. Mea au roa na Iosia te Ture a te Atua. Mea au anei na oe e haapii mai no nia ia Iehova?

“E lamepa ta oe parau i to ’u nei avae, e tiarama no to ’u nei mau e‘a.”—Salamo 119:105