Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 97

Ua fana‘o o Korenelio i te varua mo‘a

Ua fana‘o o Korenelio i te varua mo‘a

I Kaisarea, i vai na te hoê faehau toroa teitei no Roma, o Korenelio to ’na i‘oa. Noa ’tu e ere oia i te ati Iuda, mea faatura roa te ati Iuda ia ’na. Ua tauturu rahi oia i te feia veve. Ua tiaturi o Korenelio ia Iehova e ua tamau oia i te pure ia ’na. I te hoê mahana, ua fa mai te hoê melahi ia Korenelio e ua parau atu: ‘Ua faaroo te Atua i ta oe mau pure. I teie nei, a tono atu i te tahi mau taata i te oire o Iopa. I reira hoi e ora ra o Petero. A ani atu ia ’na ia haere mai i to oe fare.’ Oioi o Korenelio i te tono atu e toru taata i Iopa, e 50 kilometera i te atea i te apatoa.

I roto i tera area taime, ua ite o Petero i te hoê orama. Ua ite oia i te mau animara aita te ati Iuda i faatiahia ia amu e ua faaroo oia i te hoê reo tei faaue ia ’na ia amu atu. Ua patoi o Petero ma te parau: ‘Aita hoi au i amu a‘enei i te mau animara viivii.’ Ua na ô atura te reo: ‘A faaea i te parau e mea viivii tera mau animara. Ua tamâ te Atua i te reira.’ Ua parau atoa te reo ia Petero: ‘E toru taata i to oe uputa. A haere e farerei ia ratou.’ Ua haere atura o Petero i te uputa e ua ani oia i tera mau taata no te aha tei ǒ nei ratou. Ua pahono atura ratou: ‘Na Korenelio i tono ia matou. E faehau toroa oia no Roma. E mea tia ia haere oe i to ’na fare i Kaisarea.’ Ua titau  manihini o Petero i tera mau taata ia faaea i to ’na fare i taua po ra. I te mahana i muri iho, ua apiti oia ia ratou i Kaisarea. Oia atoa vetahi o te mau taeae no Iopa.

I to Korenelio iteraa ia Petero, ua topa turi ihora oia. Ua parau râ o Petero: ‘A tia! E taata noa hoi au mai ia oe. Ua parau mai te Atua ia haere au i to oe fare, noa ’tu eita te ati Iuda e tomo i roto i te fare o te mau taata ê. I teie nei, a parau mai na no te aha oe i tii mai ai ia ’u.’

Ua pahono atura o Korenelio ia Petero: ‘A maha mahana i teie nei, ua pure au i te Atua e ua parau mai te hoê melahi ia haere e tii ia oe. A haapii mai na i te mau parau a Iehova.’ Ua parau atura o Petero: ‘Ua haapii mai au e e ore te Atua e maitiiti i te taata. Te farii nei oia i te feia atoa e hinaaro ra e haamori ia ’na.’ Ua faaite atura o Petero ia ratou e rave rahi mau haapiiraa no nia ia Iesu. I muri iho, ua tae maira te varua mo‘a i nia ia Korenelio e i nia i te feia atoa tei apiti ia ’na. E ua bapetizohia ratou pauroa.

“I roto râ i te mau nunaa atoa, e farii [te Atua] i te taata o te mǎta‘u ia ’na e o te rave i te mea tia.”—Ohipa 10:35