Eaha to roto?

Tapura tumu parau

 HAAPIIRAA 70

Ua faaite te mau melahi e ua fanauhia o Iesu

Ua faaite te mau melahi e ua fanauhia o Iesu

O Kaisara Auguso te tia faatere o te Hau emepera Roma. Ua faaue oia i te ati Iuda atoa ia hoˈi i to ratou oire tumu no te tapaoraa iˈoa. Ua tere atura Iosepha raua Maria i Betelehema, te oire tumu o Iosepha. Fatata roa Maria i te fanau.

I to ratou taeraa mai i Betelehema, te vahi nohoraa noa ta ratou i ite, o te hoê ïa fare vairaa animara. I reira o Maria i fanau ai i ta ˈna tamaiti o Iesu. Ua tapoˈi oia i te aiû i te hoê ahu mǎrû e ua tuu oia ia ˈna i roto i te hoê phatene.

I pihai iho ia Betelehema, ua itehia vetahi mau tiai mamoe i rapaeau o te haapao ra i ta ratou mau nǎnǎ i te po. Ua fa taue mai te hoê melahi i mua ia ratou e ua haaatihia ratou e te maramarama o to Iehova hanahana. Ua riaria roa te mau tiai mamoe. Ua parau râ te melahi: ‘Eiaha e riaria! E parau apî faahiahia mau ta ˈu. Ua fanauhia te Mesia i teie mahana i  Betelehema.’ I taua taime ra, e rave rahi melahi tei fa mai i te raˈi e tei parau: ‘Ia faahanahanahia te Atua i te raˈi e ia vai hau te fenua.’ I muri iho, aita faahou te mau melahi. Eaha te huru o te mau tiai mamoe?

Ua parau te mau tiai mamoe te tahi i te tahi: ‘E haere anaˈe i Betelehema i teie nei!’ Ua haere oioi atura ratou i ǒ e ua ite ratou ia Iosepha raua Maria i te fare vairaa animara e ta raua aiû iti.

Ua maere roa te taata atoa tei faarooroo no nia i ta te melahi i parau i te mau tiai mamoe. Ua feruri maite o Maria i nia i ta te mau melahi i parau e aita roa ˈtu oia i haamoˈe i te reira. Ua hoˈi te mau tiai mamoe e haapao i ta ratou mau nǎnǎ, ma te haamauruuru ia Iehova no te mau mea atoa ta ratou i ite e i faaroo.

“Na te Atua hoi i tono mai ia ˈu i ǒ nei. Aita vau i haere mai na nia noa i to ˈu manaˈo, na ˈna râ i tono mai ia ˈu.”—Ioane 8:42