Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 53

Te itoito o Iehoiada

Te itoito o Iehoiada

E tamahine ta Iezebela. O Atalia to ’na i‘oa. E vahine ino mau oia mai to ’na metua vahine. Ua faaipoipo Atalia i te arii no Iuda. I te poheraa o ta ’na tane, na ta ’na tamaiti i faatere i te fenua. I te poheraa râ o ta ’na tamaiti, ua faaoti Atalia e na ’na e faatere ia Iuda. Ua tamata ’tura oia i te faaore roa i te opu fetii hui arii taatoa. Ua haapohe oia i te feia atoa o te nehenehe e riro ei arii. Oia atoa i ta ’na mau mootua. Ua riaria roa te taata ia ’na.

Ua taa ia Iehoiada, te tahu‘a rahi, e i ta ’na vahine, o Iehoseba, e mea ino roa ta Atalia i rave. Ua ineine raua i te pohe no te faatapuni hoê o ta Atalia mau mootua. O te aiû tamaroa, o Iehoasa ïa. Ua faaamu raua ia ’na i te hiero.

E hitu matahiti to Iehoasa i teie nei. Ua putuputu Iehoiada i te mau raatira hanere atoa e te ati Levi e ua parau atu oia: ‘A haapao i te mau uputa o te hiero. Eiaha roa ’tu hoê a‘e taata e tomo mai.’ I muri iho, ua faaarii Iehoiada ia Iehoasa i nia i te nunaa o Iuda e ua tuu oia i te korona i nia i to Iehoasa upoo. Ua tuô atura te nunaa o Iuda: ‘Ia ora te arii!’

Ua faaroo te arii vahine o Atalia i te tuôraa a te nunaa e ua horo oia i te hiero. I to ’na iteraa i te arii apî, ua tuô oia: ‘E orure hau, e orure hau!’ Ua haru atura te mau raatira hanere i te arii vahine ino mau. Ua faahaere ratou ia ’na i rapae a haapohe atu ai ia ’na. Tera râ, nafea ia faaore i te mau faahopearaa o to ’na hi‘oraa ino i nia i te nunaa?

Ua tauturu Iehoiada i te nunaa ia haamau i te hoê faufaa aore ra faaauraa e o Iehova e ia euhe ia haamori ia ’Na ana‘e. Ua faaitoito Iehoiada ia ratou ia tuparari i te hiero a Baala e te mau idolo. Ua faatoroa  oia i te mau tahu‘a e ati Levi no te ohipa i te hiero ia nehenehe te nunaa e haamori faahou i te Atua i ǒ. Ua maiti oia i te mau tiai no te haapao i te hiero ia ore te tahi noa ’‘e taata viivii e tomo atu. I muri iho, ua afai Iehoiada e te mau raatira hanere ia Iehoasa i to ’na aorai e ua tuu ratou ia ’na i nia i te terono. Ua oaoa roa to Iuda. Ua nehenehe ratou e tavini ia Iehova. Aita faahou teie vahine ino mau o Atalia e te haamoriraa a Baala. Maoti to ’na itoito, ua tauturu Iehoiada i e rave rahi taata, e ere anei?

“Eiaha e mǎta‘u i te feia e haapohe ia outou, e ore râ e tia ia faaore i te ora. A mǎta‘u râ i te Atua, e tia hoi ia ’na ia faaore roa i te ora e te tino i Gehena.”—Mataio 10:28