Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 24

Aita ratou i tapea i ta ratou i euhe

Aita ratou i tapea i ta ratou i euhe

Ua parau Iehova ia Mose: ‘Haere mai ia ’u ra i nia i te mou‘a. E papai atu vau i ta ’u mau ture i nia i te papa ofai e e horoa ’tu vau i te reira ia oe.’ Haere atura Mose i nia i te mou‘a e vai atura oia i ǒ e 40 rui e 40 po i te maoro. I reira Iehova i papai ai i na Ture Ahuru i nia e piti papa ofai e i horoa ’i i te reira ia Mose.

I muri iti a‘e, ua mana‘o te mau Iseraela e ua faarue Mose ia ratou. Parau atura ratou ia Aarona: ‘Hinaaro matou i te hoê taata aratai. A hamani i te hoê atua no matou!’ Pahono atura Aarona: ‘A horoa mai i ta outou mau tao‘a auro.’ Faatahe atura oia i te auro no te hamani i te hoê tii mai te huru o te hoê kafa aore ra fanau‘a puaatoro. Parau atura te nunaa: ‘Teie kafa, o te Atua ïa tei aratai ia tatou i rapaeau ia Aiphiti!’ E ua haamata ratou i te haamori i tera kafa auro. Faatupu atura ratou i te hoê arearearaa. E mea ino anei te reira? E, no te mea ua euhe te nunaa e e haamori ratou ia Iehova noa. Aita râ ratou i tapea i tera euhe.

 Ua ite Iehova eaha tei tupu e ua parau oia ia Mose: ‘A pou no te haere e hi‘o i te nunaa. Te faaroo ore ra ratou ia ’u e te haamori ra ratou i te hoê atua hape.’ Pou atura Mose mai te mou‘a mai ma te amo i na papa ofai e piti.

A haafatata ’i Mose i te puhapa, ua faaroo oia i te nunaa o te himene ra. I muri iho, ua ite oia ia ratou i te oriraa e i te tipaparaa i mua i te kafa. Ua riri roa o Mose. Taora ’tura oia i na papa ofai e piti i raro e ua parari roa te reira. Oioi oia i te haaparari i te tii. E ani atura oia ia Aarona: ‘Nafea te nunaa i turai ai ia oe ia rave i tera ohipa ino mau?’ Pahono atura Aarona: ‘Eiaha e riri. Ua ite oe i te huru o tera nunaa. Ua hinaaro ratou i te hoê atua. No reira vau i faatahe ai i ta ratou tao‘a auro i roto i te auahi e ua matara mai teie kafa!’ Ahiri aita Aarona i rave i tera ohipa! Ho‘i atura Mose i nia i te mou‘a no te taparu ia Iehova ia faaore i te hapa a te nunaa.

Ua faaore Iehova i te hapa a te feia tei hinaaro e faaroo ia ’na. Ua ite anei oe no te aha e mea faufaa roa no te mau Iseraela ia pee i te aratairaa a Mose?

“Ia euhe oe i te euhe i te Atua ra, e faaitoito i te rave; e ore hoi oia e au mai i te maamaa ra: e tena na, e hopoi i ta oe i euhe ra.”—Koheleta 5:4