Eaha to roto?

Tapura tumu parau

 HAAPIIRAA 32

Te hoê aratai apî e e piti vahine itoito

Te hoê aratai apî e e piti vahine itoito

Ua aratai Iosua i te nunaa o Iehova e rave rahi matahiti i te maoro. I muri aˈe, ua pohe oia, e 110 matahiti ïa to ˈna. A ora ˈi Iosua, ua haamori to Iseraela ia Iehova. I muri aˈe râ i to Iosua poheraa, ua haamata ratou i te haamori i te mau idolo, mai ta te feia no Kanaana i rave. Aita to Iseraela i tamau i te tavini ia Iehova. Ua faatia ïa Iehova i te hoê arii no Kanaana, o Iabina to ˈna iˈoa, no te haafifi i te oraraa o to Iseraela. Taparu ihora te nunaa i te tauturu a Iehova. Horoa ˈtura Iehova ia ratou i te hoê aratai apî, o Baraka to ˈna iˈoa. Na ˈna e tauturu i te nunaa ia hoˈi ia Iehova.

Te vai ra te hoê peropheta vahine, o Debora to ˈna iˈoa. Ua faaue oia ia Baraka ia haere mai ia ˈna ra. E poroi ta ˈna no ô mai ia Iehova no Baraka: ‘A rave 10 000 tane e a aro atu i te nuu a Iabina i te pape o Kisona. I reira e pohe ai Sisera, te aratai o te nuu a Iabina.’ Ua parau Baraka ia Debora: ‘E haere atu vau, e haere mai atoa râ oe na muri ia ˈu.’ Ua na ô atura oia: ‘E haere atu vau na muri ia oe. Ia ite râ oe e eita Sisera e pohe i to oe rima. Ua parau Iehova e na te hoê vahine e haapohe ia ˈna.’

Ua haere atura Debora na muri ia Baraka e i ta ˈna nuu i te mouˈa Tabora no te faaineine i te aroraa. I te taime Sisera i ite ai i te reira, ua putuputu oia i ta ˈna mau pereoo tamaˈi e i ta ˈna nuu i te peho i raro ra. Ua parau Debora  ia Baraka: ‘Teie te mahana e horoa ˈi Iehova i te upootiaraa ia oe ra.’ Haere atura Baraka e ta ˈna mau 10 000 faehau no te aro i te nuu puai a Sisera i raro noa ˈˈe i te mouˈa.

Ua pue taue mai te pape o Kisona. Na Iehova i rave i te reira. Mau atura te mau pereoo tamaˈi o Sisera i roto i te vari. Faarue atura Sisera i to ˈna pereoo tamaˈi e haamata ˈtura oia i te horo. Ua pau te nuu a Sisera. Ua nehenehe râ o Sisera e ora mai! Ua horo ê oia e ua tapuni oia i roto i te tiahapa o te hoê vahine, o Iaela to ˈna iˈoa. Ua horoa tera vahine ia ˈna i te û no te inu e i muri iho, ua tapoˈi oia ia ˈna e te hoê ahu. Taoto atura teie faehau no to ˈna rohirohi rahi. Ma te ore e maniania, ua haere Iaela ia Sisera ra e ua patiti oia i te hoê tǐtǐ tiahapa i to Sisera upoo. E ua pohe o Sisera.

Tae atura Baraka no te paimi ia Sisera. Haere atura Iaela i rapaeau i to ˈna tiahapa no te parau atu: ‘Haere mai i roto i te tiahapa. E faaite atu vau i te taata ta oe e paimi nei.’ Haere atura Baraka i roto i te tiahapa e ite atura oia ia Sisera tei haapohehia. Ua arue atura Baraka raua Debora ia Iehova no te mea maoti Oia i upootia ˈi to Iseraela i nia i to ratou mau enemi. Ua vai hau noa to Iseraela i te roaraa o na 40 matahiti i muri mai.

“E tohu hoi ta outou mau tamarii tamaroa e te mau tamahine.”—Ioela 2:28