Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 87

Te amuraa maa ahiahi hopea a Iesu

Te amuraa maa ahiahi hopea a Iesu

Ua faatupu te ati Iuda i te oroa Pasa i te matahiti taitahi i te 14 no te ava‘e Nisana. E haamana‘o ïa ratou e nafea Iehova i faaora ’i ia ratou i te faatîtîraa i Aiphiti e e nafea oia i aratai ai ia ratou i te Fenua tǎpǔhia. I te matahiti 33, ua faatupu o Iesu e ta ’na mau aposetolo i te oroa Pasa i Ierusalema i te hoê piha i nia. A oti ai te reira, ua parau o Iesu: ‘Te vai ra hoê o outou o te taiva ia ’u.’ Ua huru ê roa te mau aposetolo e ua ani ratou ia Iesu: ‘O vai tera taata?’ Ua pahono atura Iesu: ‘O te taata ta ’u e horoa ’tu i tera pane.’ Ua horoa ’tura o Iesu i te pane ia Iuda Isakariota. Oioi o Iuda i te tia e i te faarue i te piha.

I muri iho, ua pure o Iesu, ua ofatifati oia i te pane e ua toro oia i te reira i te mau aposetolo tei faaea ia ’na ra. Ua parau oia: ‘A amu i tera pane. E faahoho‘araa te reira i to ’u tino ta ’u e horoa ’tu na outou.’ I muri iho, ua pure oia no te tahi au‘a uaina e ua horoa oia i te reira i ta ’na mau aposetolo. Ua parau oia: ‘A inu i tera uaina. E faahoho‘araa te reira i to ’u toto ta ’u e horoa ’tu no te faaore i te mau hara. Te fafau atu nei au e e apiti outou ia ’u ei arii i te ra‘i. A faatupu i te reira i te matahiti taitahi no te haamana‘o ia ’u.’ Te na reira noa ra te mau pǐpǐ a Iesu hoê taime i te matahiti taitahi i te ahiahi. Teie putuputuraa, o te Amuraa maa ïa a te Fatu.

 I muri iho i te amuraa maa, ua aimârô atura te mau aposetolo no te ite o vai te mea rahi a‘e i rotopu ia ratou. Ua parau râ Iesu ia ratou: ‘Ia riro te taata rahi a‘e i rotopu ia outou mai te tamarii hopea e mai te taata haihai a‘e.

O outou to ’u mau hoa. Te faaite atu nei au i te mau mea atoa ta to ’u Metua e hinaaro ra ia faaite atu vau. Fatata roa vau i te ho‘i atu i te ra‘i i to ’u Metua ra. E vai outou i ǒ nei. E ite te mau taata e pǐpǐ outou na ’u maoti to outou here te tahi i te tahi. E mea tia ia here outou te tahi i te tahi mai ia ’u i here ia outou.’

I te pae hopea, ua pure o Iesu no te ani ia Iehova ia paruru i ta ’na mau pǐpǐ atoa. Ua ani oia ia Iehova ia tauturu ia ratou ia ohipa amui i roto i te hau. Ua pure oia ia mo‘a to Iehova i‘oa. I muri iho, ua himene o Iesu e ta ’na mau aposetolo i te mau himene no te arue ia Iehova e ua haere ratou i rapae. Fatata te taime e tapeahia ’i o Iesu.

“Eiaha e mǎta‘u, nǎnǎ iti, ua faaoti hoi to outou Metua i te horoa ’tu i te Faatereraa arii na outou.”—Luka 12:32