Ua haapapu Mose ia Pharao e aore oia e tamata faahou i te farerei ia ˈna. Hou râ oia i faarue ai ia Pharao, ua parau Mose: ‘I teie tuiraa po, e pohe pauroa te mau tamarii matahiapo i Aiphiti, mai te tamarii a Pharao e tae atu i te tamarii a te mau tavini.’

Ua parau Iehova i to Iseraela ia faaineine i te hoê maa taa ê. Ua na ô oia: ‘A haapohe i te hoê mamoe oni aore ra puaaniho oni, hoê matahiti to ˈna. A tuu i nia i te uputa maa toto o te animara. A tunu i te iˈo e a amu i te reira e te pane hopue ore. A omono i te ahu e te tiaa, ia ineine outou no te haere ê. I teie po, e faatiamâ vau ia outou.’ A feruri na i te oaoa rahi o te ati Iseraela.

I te tuiraa po, ua haere te melahi a Iehova i te mau fare atoa i Aiphiti. I te mau fare atoa aore e toto i nia i te uputa, ua pohe te tamarii matahiapo. Ua na nia ˈˈe râ te melahi i te mau fare i vai ai te toto i nia i te uputa. Ua ere te mau utuafare atoa i Aiphiti i te hoê tamarii, e utuafare taoˈa rahi anei aore ra veve. Tera râ, aita hoê aˈe tamarii Iseraela i pohe.

Ua pohe atoa te tamaiti a Pharao. Ua oti roa Pharao. Oioi oia i te parauraa ia Mose e ia Aarona: ‘A tia i nia, a haere ê atu. A haere e haamori i to outou Atua. A rave i ta outou mau animara e a haere!’

 E po atiraa avaˈe i taua taime ra. Ua faanahohia to Iseraela ei pǔpǔ utuafare e ei opu no te faarue ia Aiphiti. E 600 000 tane Iseraela e e rave rahi vahine e tamarii. E rave rahi atoa taata ê tei apiti ia ratou ia nehenehe atoa ratou e haamori ia Iehova. Ua faatiamâhia to Iseraela!

No te haamanaˈo mea nafea Iehova i faaora ˈi ia ratou, ua tamau ratou i te faaineine i taua maa taa ê ra i te matahiti taitahi. Ua piihia te reira te Pasa, o “na nia ˈˈe” te auraa.