Eaha to roto?

Tapura tumu parau

 HAAPIIRAA 9

E tamaiti ta raua!

E tamaiti ta raua!

Mea maoro Aberahama e Sara i te faaipoiporaa. Ua faarue raua i to raua fare au mau i Ura no te ora i roto i te hoê tiahapa. Aita râ Sara i amuamu no te mea ua tiaturi noa oia ia Iehova.

Ua hinaaro rahi o Sara i te hoê tamarii. Ua parau atura oia ia Aberahama: ‘Ia fanau ta ˈu tavini o Hagara i te hoê tamarii, mai te huru ra e o ta ˈu atoa ïa tamarii.’ I muri aˈe, ua fanau o Hagara i te hoê tamaiti. O Isemaela to ˈna iˈoa.

E rave rahi matahiti i muri iho, e 99 matahiti ïa to Aberahama e e 89 matahiti to Sara, e toru taata tei tae mai. Ua titau manihini Aberahama ia ratou ia faafaaea i raro aˈe i te hoê tumu raau no te tamaa. Ua ite anei oe o vai ratou? E mau melahi! Ua parau ratou ia Aberahama: ‘I te matahiti i mua, e fanau ta oe vahine i te hoê tamaiti.’ Ua faaroo Sara i tera parau mai roto mai i to ˈna tiahapa. Ua ata oia ma te manaˈo e: ‘E nehenehe iho â anei au e fanau i te tamarii? Ua ruau roa hoi au!’

Hoê matahiti i muri iho, ua fanau Sara i te hoê tamaiti, mai ta te melahi a Iehova i fafau. O Isaaka ïa te iˈoa ta Aberahama i horoa no ˈna. O “Ata” ïa te auraa o tera iˈoa.

 E pae matahiti to Isaaka i teie nei e ua ite Sara ia Isemaela i te faaoooraa ia Isaaka. Ua hinaaro Sara e paruru i ta ˈna tamaiti. Ua ani ïa oia ia Aberahama ia haere Hagara e Isemaela i te vahi ê. I te omuaraa, aita Aberahama i hinaaro e rave i te reira. Tera râ, ua hinaaro atoa Iehova e paruru ia Isaaka. Ua parau atura oia ia Aberahama: ‘A faaroo ia Sara. E haapao atu vau ia Isemaela. Mea na roto ia Isaaka e faatupu ai au i ta ˈu i fafau.’

“No te faaroo atoa i noaa ˈi ia Sara te puai e hapû ai oia, . . . i te mea e ua papu ia ˈna e e nehenehe e tiaturi i Tei fafau mai ia ˈna ra.”—Hebera 11:11