Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 95

Aita hoê a‘e ohipa tei nehenehe e tapea ia ratou

Aita hoê a‘e ohipa tei nehenehe e tapea ia ratou

I vai na te hoê taata pirioi tei parahi i te hoê uputa o te hiero e tei taparu i te tahi mau ô i te mau mahana atoa. I te hoê ahiahi, ua ite oia ia Petero raua Ioane i te haereraa i roto i te hiero. Ua parau oia ia raua: ‘A horoa mai na i te tahi ô na ’u.’ Ua parau atura Petero: ‘E ohipa maitai a‘e i te moni ta ’u e horoa ’tu ia oe. I te i‘oa o Iesu, a tia i nia e a haere!’ Ua tauturu atura o Petero ia ’na ia tia e ua haamata ’tura taua taata ra i te hahaere! Ua oaoa roa te nahoa no tera semeio e e rave rahi atu â taata tei riro mai ei pǐpǐ.

Tera râ, ua riri roa te mau tahu‘a e te mau Sadukea. Ua haru ratou i te mau aposetolo no te afai atu i mua i te Sunederi, te tiripuna faaterehia na te mau tia faaroo. Ua ani atu ratou: ‘O vai tei horoa ia outou i te mana no te faaora i tera taata?’ Ua pahono atura Petero: ‘O Iesu Mesia, te taata ta outou i haapohe, tei horoa mai i te mana.’ Ua tuô atura te mau tia faaroo: ‘A faaea i te paraparau no nia ia Iesu!’ Ua pahono râ te mau aposetolo: ‘E mea tia ia paraparau matou no nia ia ’na. Aita roa ’tu matou e faaea i te na reira.’

I te taime iho â i faatiamâhia ’i o Petero raua Ioane, ua haere ratou e farerei i te tahi atu mau pǐpǐ e ua faatia atu ratou eaha tei tupu. Ua pure amui ratou ia Iehova, a parau ai: ‘A tauturu na ia matou ia itoito mai ia nehenehe matou e tamau i te rave i ta oe ohipa.’ Ua horoa ’tura Iehova ia ratou i to ’na varua mo‘a e ua tamau ratou i te poro e i te faaora i te taata. E rave rahi atu â taata tei riro mai ei pǐpǐ. No to ratou pohehae rahi, ua tapea e ua huri te mau Sadukea i te mau aposetolo i roto i te fare tapearaa. I taua po ra, ua tono Iehova i te hoê melahi tei tatara i te mau opani o te fare tapearaa e tei parau i te mau aposetolo: ‘A ho‘i i te hiero e a haapii atu i te taata i ǒ.’

I te poipoi i muri iho, ua parau te mau tia faaroo o te Sunederi: ‘Mea opani noâ te fare tapearaa, ua haere râ te feia ta outou i tapea! Tei te hiero ratou e te haapii atu ra ratou i te mau taata!’ Ua tapea-faahou-hia te mau aposetolo  e ua afaihia ratou i te Sunederi. Ua na ô atura te tahu‘a rahi: ‘Ua faaue atu matou eiaha outou e paraparau no nia ia Iesu!’ Ua pahono atura râ Petero: “O te Atua ei faatere ta matou e auraro e tia ’i, eiaha te taata.”

Ua riri roa te mau tia faaroo e ua hinaaro roa ratou e haapohe i te mau aposetolo. Ua tia râ te hoê Pharisea, o Gamaliela to ’na i‘oa, e ua na ô oia: ‘A haapao maitai! Peneia‘e tei tera mau taata ra te Atua. Te hinaaro iho â anei ra outou e aro i te Atua?’ Ua faaroo ratou i to ’na mana‘o. Ua tairi râ ratou i te mau aposetolo i te raau. Ua faaue faahou te mau tia faaroo ia ratou ia faaea i te poro hou a vaiiho ai ia ratou ia haere. Aita râ te reira i tapea i te mau aposetolo. Ua tamau ratou i te poro i te parau apî oaoa ma te itoito, i te hiero e i tera e tera fare.

“O te Atua ei faatere ta matou e auraro e tia ’i, eiaha te taata.”—Ohipa 5:29