Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 49

Ua faautuahia te hoê arii vahine ino mau

Ua faautuahia te hoê arii vahine ino mau

Mai te haamaramarama o to ’na aorai i Iezereela, ua ite te arii Ahaba i te tahi ô vine tei fatuhia e te hoê taata, o Nabota to ’na i‘oa. Ua hinaaro Ahaba i tera ô vine e ua tamata oia i te hoo mai i te reira ia Nabota ra. Ua patoi râ Nabota i te hoo atu i te reira no te mea ia au i te ture a Iehova, mea opanihia ia hoo atu i te hoê fenua tutuuhia. Ua faatura anei Ahaba ia Nabota no te mea ua rave Nabota i te mea maitai? Aita. Ua riri roa Ahaba. No to ’na riri rahi, aita oia i hinaaro faahou e haere i rapae i to ’na piha e e tamaa.

Ua parau atura te vahine a Ahaba, te arii vahine ino mau ïa o Iezebela: ‘O oe te arii no Iseraela. E nehenehe oe e rave i te mau mea atoa ta oe e hinaaro. Na ’u e horoa i tera fenua no oe.’ Ua papai te arii vahine i te mau rata i te mau matahiapo o te oire. Ua ani oia ia ratou ia pari haavare e ua faahiti Nabota i te ino i nia i te Atua e ia tupai ia ’na i te ofai no te haapohe atu. Ua rave te mau matahiapo i ta Iezebela i parau atu. I muri iho, ua parau Iezebela ia Ahaba: ‘Ua pohe o Nabota. Na oe te ô vine i teie nei.’

E ere o Nabota ana‘e te taata tia ta Iezebela i haapohe atu. Ua haapohe tera vahine i e rave rahi taata tei here ia Iehova. Ua haamori oia i te mau idolo e ua rave i te tahi atu mau ohipa ino. Ua ite Iehova i te mau ohipa ino atoa ta Iezebela i rave. Eaha ïa ta Iehova e rave a ite ai i te reira?

I muri a‘e i te poheraa o Ahaba, ua riro ta ’na tamaiti, o Iehorama, ei arii. Ua tono Iehova i te hoê taata, o Iehu to ’na i‘oa, no te faautua ia Iezebela e i to ’na utuafare.

Ua faahoro Iehu i to ’na pereoo puaahorofenua no te haere i ǒ Iezebela. Ua haere Iehorama na nia i to ’na pereoo puaahorofenua no te farerei ia Iehu e ua parau atu: ‘Te vai ra anei te hau i rotopu ia tâua?’ Pahono atura Iehu: ‘Eita te hau e vai inaha te rave noa ra to oe metua vahine, o Iezebela, i te ino.’ Ua tamata Iehorama i te haere ê na nia i to ’na pereoo puaahorofenua. Tera râ, ua haapohe Iehu ia Iehorama ma te faaohipa i ta ’na ohe.

 I muri iho, ua haere Iehu i to Iezebela aorai. A ite ai te arii vahine e te tae mai ra o Iehu, ua faanehenehe oia ia ’na, ua pahere i to ’na rouru e ua tiai atu i to ’na haamaramarama i te tahua o to ’na aorai. I to Iehu taeraa mai, ua manava te arii vahine ia ’na ma te faatura ore. Ua tuô Iehu i te mau tavini a Iezebela tei tia noa mai i pihai iho i te arii vahine: ‘A huri mai ia ’na i raro nei!’ Mai te haamaramarama, ua huri ratou ia Iezebela i raro. Ua topa te arii vahine e ua pohe oia.

I muri a‘e, ua haapohe Iehu i na tamaiti a Ahaba e 70 e ua faaore roa oia i te haamoriraa a Baala i te fenua. Ua taa anei ia oe e e ite Iehova i te mau mea atoa e e faautua oia i te feia e rave ra i te ino i te taime tano?

“E noaa oioi noa mai vetaitahi tufaa i te matamua ra; e ore râ te hopea e haamaitaihia.”—Maseli 20:21