Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 91

Ua faatiahia mai o Iesu

Ua faatiahia mai o Iesu

I muri a‘e i to Iesu poheraa, ua haere te hoê taata moni, o Iosepha to ’na i‘oa, e farerei ia Pilato ia faatia mai ia ’na ia rave i to Iesu tino pohe i nia i te pou. Ua vehî atura Iosepha i te tino i te ahu lino maitai ma te raau no‘ano‘a e ua tuu ihora i roto i te hoê menema apî. E ofai teiaha mau i te tomoraa o te menema. Ua parau te mau tahu‘a tiaau ia Pilato: ‘Mana‘o ana‘e matou e haere mai vetahi o ta Iesu mau pǐpǐ e rave i to ’na tino no te parau e ua faatiahia mai oia.’ Ua parau atura o Pilato ia ratou: ‘A tapiri maitai i te menema i te ofai e a tuu atu i te hoê tiai.’

E toru mahana i muri iho, i te poipoi roa, ua haere vetahi mau vahine i te menema e ua ite ratou e ua turaihia te ofai ia matara mai te tomoraa. I roto i te menema, ua parau te hoê melahi i te mau vahine: ‘Eiaha e mǎta‘u. Ua faatiahia mai o Iesu. A haere e a faaite i ta ’na mau pǐpǐ ia farerei ia ’na i Galilea.’

Oioi o Maria Magadala i te imi ia Petero raua Ioane. Ua parau atura oia ia raua: ‘Ua hopoi-ê-hia to Iesu tino!’ Ua horo ihora o Petero raua Ioane i te menema. A ite ai e aita faahou e taata i roto i te menema, ua ho‘i raua i to raua fare.

I to Maria ho‘iraa ’tu i te menema, ua ite oia i na melahi e piti i roto i te menema e ua parau oia ia raua: ‘Aita vau i ite ihea to ta ’u Fatu tino i te tuuraahia.’ I muri iho, ua ite oia i te hoê tane. Ua mana‘o o Maria e o te taata tamâ aua tera tane. Ua parau atura oia ia ’na: ‘Faaite mai na ihea to oe tuuraa ia ’na.’ Ua na ô râ te tane: “Maria!” Ite atura o Maria e o Iesu tera tane. Ua tuô oia: “Orometua!” e ua tauahi oia ia ’na. Ua parau atura o Iesu ia ’na: ‘A haere e faaite i to ’u mau taeae e ua ite oe ia ’u.’ Ua horo a‘era o Maria i te mau pǐpǐ ra e ua faaite atu e ua ite oia ia Iesu.

Tau taime i muri iho, i taua noâ mahana, ua tere e piti pǐpǐ na nia i te purumu mai Ierusalema e tae atu i Emausa. Ua apiti ihora te hoê taata ia raua i nia i te purumu e ua ani oia eaha ta raua paraparauraa. Ua pahono atura raua: ‘Aita oe i faarooroo a‘enei? E toru mahana i mairi, ua haapohe te mau tahu‘a tiaau ia Iesu. I teie nei, te parau ra vetahi mau vahine e ua ite ratou ia ’na e te ora noa ra oia.’ Ua ani atura te taata: ‘Te tiaturi anei  orua i te mau peropheta? Ua tohu ratou e e pohe te Mesia e i muri iho e faatiahia mai oia.’ Ua tamau oia i te faataa ’tu i te mau irava Bibilia. I to ratou taeraa ’tu i Emausa, ua ani te mau pǐpǐ i tera taata ia apiti ia raua. I te hora tamaaraa i te po, i muri a‘e i to tera taata pureraa no te pane, ua taa ia ratou e o Iesu oia. E ua mo‘e ihora o Iesu.

Oioi taua na pǐpǐ i te haere i Ierusalema i te vahi e putuputu ai te mau aposetolo. Ua faatia raua i tei tupu. Tei ǒ noâ ratou i roto i te fare e ua fa mai nei o Iesu ia ratou pauroa. I te omuaraa, aita te mau aposetolo i nehenehe e tiaturi e o Iesu iho â tera taata. Ua parau atura oia: ‘A hi‘o na i to ’u na rima; a fafa mai. Ua papaihia e faatiahia mai te Mesia, mai te pohe mai.’

“O vau te e‘a e te parau mau e te ora. Aore roa e taata e tae i te Metua ra, na roto noa râ ia ’u.”—Ioane 14:6

No te ite atu â

IESU TE E‘A, TE PARAU MAU, TE ORA

Faaineineraahia e hunaraahia to Iesu tino

No te aha mea ru ia huna ia Iesu hou te toparaa mahana?

IESU TE E‘A, TE PARAU MAU, TE ORA

Ua tia mai Iesu!

I muri iho i to Iesu faatiaraahia mai, e faaite na mua oia ia ’na i te hoê vahine, e pǐpǐ, e i te mau aposetolo i muri iho.

IESU TE E‘A, TE PARAU MAU, TE ORA

Faraa Iesu tei faatiahia mai i e rave rahi

E nafea Iesu e haapapu ai i ta ’na mau pǐpǐ e ua faatiahia mai oia?