I muri aˈe i to Iesu pororaa e hoê matahiti e te afa i te maoro, e faaotiraa faufaa roa ta ˈna i titauhia ia rave. O vai ma ta ˈna e maiti no te ohipa amui e o ˈna? O vai ta ˈna e faaineine no te faatere i te amuiraa Kerisetiano? No te rave i tera mau faaotiraa, ua hinaaro Iesu i ta Iehova aratairaa. Ua haere atura oia i te hoê mouˈa o o ˈna anaˈe e ua pure oia i te po taatoa. I te poipoi, ua putuputu Iesu ia vetahi o ta ˈna mau pǐpǐ e ua maiti oia i ta ˈna na aposetolo 12. Te haamanaˈo anei ra oe i to ratou mau iˈoa? Te vai ra o Petero, Anederea, Iakobo, Ioane, Philipa, Baretolomea, Toma, Mataio, Iakobo te tamaiti a Alephaia, Tadaio, Simona e o Iuda Isakariota.

E apiti na aposetolo 12 ia Iesu i roto i ta ˈna mau tere. I muri aˈe i to Iesu faaineineraa ia ratou, ua tonohia ratou no te haere e poro o ratou anaˈe. Ua horoa Iehova i te mana ia ratou no te tiavaru i te mau demoni e no te faaora i te feia maˈi.

Ua riro na aposetolo 12 ei hoa no Iesu e ua tiaturi rahi Iesu ia ratou. No te mau Pharisea, aita te mau aposetolo i haere i te  haapiiraa e aita to ratou e tiaraa teitei. Noa ˈtu râ, ua faaineine Iesu ia ratou no ta ratou ohipa. E apee ratou ia Iesu i te mau taime faufaa roa ˈˈe o to ˈna oraraa, mai te taime hou oia e pohe ai aore ra i muri aˈe i to ˈna tia-faahou-raa. Mai ia Iesu, no Galilea mai te rahiraa o na aposetolo 12. Ua faaipoipohia vetahi o ratou.

E feia tia ore te mau aposetolo e e hape atoa ratou. I te tahi mau taime, ua paraparau ratou ma te ore e feruri na mua e ua rave ratou i te mau faaotiraa hape. I te tahi atu mau taime, aita ratou i faaite i te faaoromai. Ua tatamaˈi atoa ratou no te ite o vai te teitei aˈe i rotopu ia ratou. Tera râ, e mau taata maitai ratou e ua here ratou ia Iehova. I muri aˈe i to Iesu hoˈiraa i te raˈi, o ratou te mau mero matamua o te amuiraa Kerisetiano e e hopoia faufaa roa ta ratou i roto i te amuiraa.