Eaha to roto?

Tapura tumu parau

 HAAPIIRAA 85

Ua faaora o Iesu i tei maˈihia i te Sabati

Ua faaora o Iesu i tei maˈihia i te Sabati

Mea riri roa na te mau Pharisea ia Iesu e ua imi ratou i te ravea no te tapea ia ˈna. Ua parau ratou e mea ino ia faaora oia i tei maˈihia i te Sabati. I te hoê Sabati, ua ite Iesu i te hoê taata tei fanauhia ei matapo o tei taparuparu i te pae purumu. Ua parau oia i ta ˈna mau pǐpǐ: ‘A hiˈo na e nafea te puai o te Atua e tauturu ai i tera taata.’ Ua ôi o Iesu i to ˈna huare e te repo e ua parai oia i te reira i nia i na mata o teie taata. Ua parau atura Iesu ia ˈna: ‘A haere e horoi i to oe na mata i te pape hopu o Siloama.’ Ua na reira te taata e ua ite oia no te taime matamua o to ˈna oraraa.

Ua maere roa te mau taata. Ua na ô ratou: ‘E ere anei oia te taata tei matau i te parahi e i te taparuparu aore ra o te tahi atu taata tera o te hohoˈa ra ia ˈna?’ Ua parau atura te taata: ‘O vau te taata matapo!’ Ua ani atura te mau taata ia ˈna: ‘No te aha e ere faahou oe i te matapo?’ Ua faaite oia eaha tei tupu. Ua afai atura te mau taata ia ˈna i mua i te mau Pharisea.

Ua parau atura tera taata i te mau Pharisea: ‘Ua parai o Iesu i nia i to ˈu na mata i te repo e te huare ôihia e ua parau mai oia ia haere e horoi i to ˈu na mata. O ta ˈu ïa i rave e i teie nei, e nehenehe au e ite.’ Ua na ô te mau Pharisea: ‘Te faaora ra o Iesu i tei maˈihia i te mahana Sabati. E ere ïa to ˈna puai no ǒ mai i te Atua.’ Ua parau râ vetahi: ‘Mai te peu e ere to ˈna puai no ǒ mai i te Atua, eita oia e nehenehe e faaora i te tahi noa ˈˈe taata.’

Ua pii atura te mau Pharisea i te mau metua o tera taata e ua ani atu ratou: ‘No te aha ta orua tamaiti e ite ai i teie  nei?’ Ua riaria to ˈna na metua no te mea ua parau te mau Pharisea e e tiahihia i rapaeau i te sunago te mau taata atoa e faatupu ra i te faaroo ia Iesu. Ua parau atura raua: ‘Aita maua e ite aˈe ra. A ani atu ia ˈna.’ Ua ui te mau Pharisea i e rave rahi atu â uiraa i taua taata ra e tae roa ˈtu i te taime i na ô ai te taata: ‘Ua faaite au ia outou i te mau mea atoa ta ˈu i ite. No te aha te tamau nei outou i te ani mai?’ Ua riri roa te mau Pharisea e ua tiavaru ihora ratou ia ˈna.

Ua imi o Iesu i taua taata ra e ua ani atu oia: ‘Te faatupu anei ra oe i te faaroo i te Mesia?’ Ua pahono atura te taata: ‘E na reira vau mai te peu e ite au o vai o ˈna.’ Ua parau atura Iesu: ‘O vau te Mesia.’ E taata maitai o Iesu, e ere anei? Ua faaora oia i tera taata e ua tauturu atoa oia ia ˈna ia faatupu i te faaroo.

“Ua hape outou, no te mea aita outou i ite i te mau Papai e e nafea te mana o te Atua e ohipa ˈi.”—Mataio 22:29