Hou noa mai te oroa Pasa i te matahiti 32, ua hoˈi mai te mau aposetolo mai ta ratou pororaa mai. Ua rohirohi roa ratou. Ua haere ïa ratou e o Iesu na nia i te poti i Betesaida ia nehenehe ratou e faafaaea. Tera râ, a tapae ai te poti i te pae tahatai, ua ite o Iesu e ua apee tausani taata ia ratou. Noa ˈtu ua hinaaro o Iesu e vai o ˈna anaˈe e ta ˈna mau aposetolo, ua farii maitai oia i te mau taata. Ua faaora oia i tei maˈihia e ua haamata oia i te haapii atu ia ratou. I te roaraa o te mahana, ua haapii Iesu ia ratou no nia i te Faatereraa arii a te Atua. A topa ˈi te mahana, ua parau ta ˈna mau aposetolo ia ˈna: ‘Ua poia roa paha te mau taata. A parau ia ratou ia hoˈi ia nehenehe ratou e hoo mai i te maa na ratou.’

Ua pahono Iesu: ‘Ia faaea mai ratou. Na outou e faatamaa ia ratou i ǒ nei.’ Ua ani atura te mau aposetolo: ‘Te hinaaro anei ra oe ia haere matou e hoo mai i te faraoa na ratou?’ Ua parau o Philipa, hoê o na aposetolo: ‘Noa ˈtu mea rahi ta tatou moni, eita e navai no te hoo mai i te faraoa no tera nahoa taata.’

Ua ani atura Iesu: ‘E maa anei ta tatou?’ Ua pahono atu o Anederea: ‘E pae faraoa e e piti iˈa nainai ta tatou. Eita te reira e navai.’ Ua parau atura Iesu: ‘A afai mai na i te faraoa e te iˈa.’ Ua faaue oia i te mau taata ia parahi i nia i te aihere e ia haaputuputu ei pǔpǔ e 50 e 100 taata. Ua rave atura Iesu i te faraoa e te iˈa, ua hiˈo oia i te raˈi e ua pure oia. I muri iho, ua horoa oia i te maa i ta ˈna mau aposetolo ia  opere ratou i te reira i te mau taata. Ua tamaa na 5 000 tane e te mau vahine e tamarii e ua paia roa ratou. I muri iho, ua haaputu te mau aposetolo i te maa tei toe, ia ore te reira e haamâuˈahia. Ua î roa 12 farii! E semeio maere mau te reira, e ere anei?

Ua maere roa te mau taata e ua hinaaro ratou e faariro ia Iesu ei arii no ratou. Teie râ, ua ite Iesu e e ere tera te taime faataahia na Iehova no te faariro ia ˈna ei arii. Ua parau oia i te nahoa taata ia hoˈi i ǒ ratou. Ua faaue atoa oia i ta ˈna mau aposetolo ia haere i te tahi atu pae o te miti o Galilea. Ua na reira ratou na nia i te poti e ua haere Iesu i nia i te hoê mouˈa o o ˈna anaˈe. No te aha? No te mea ua hinaaro oia e pure i to ˈna Metua. Noa ˈtu e rave rahi ohipa ta ˈna, ua tamau Iesu i te rave i te taime no te pure.