Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 20

To muri nei na ati e ono

To muri nei na ati e ono

Ua haere Mose raua Aarona e faaite ia Pharao i teie poroi a te Atua: ‘Ia ore oe e vaiiho i to ’u nunaa ia haere ê atu, e î te fenua i e rave rahi ra‘o rarahi.’ E ra‘o rarahi hoi o te patia i te taata. Ua parare roa te reira i roto i te fare o to Aiphiti, e feia tao‘a rahi anei aore ra e feia veve. Ua î te fenua taatoa i tera mau ra‘o rarahi. Area i te fenua o Gosena, i reira e ora ’i to Iseraela, aita e ra‘o rarahi. Mai teie ati maha, ua tupu to muri nei mau ati i nia noa i to Aiphiti. Ani atura Pharao: ‘Taparu ia Iehova ia faaore i tera mau ra‘o rarahi. E nehenehe to oe nunaa e haere ê atu.’ I te taime râ Iehova i faaore ai i te mau ra‘o rarahi, ua taui Pharao i to ’na mana‘o. E huti mai anei Pharao i te haapiiraa?

Ua parau Iehova: ‘Ia ore Pharao e vaiiho i to ’u nunaa ia haere ê atu, e ma‘i e e pohe ta Aiphiti mau animara.’ Te mahana i muri iho, haamata ’tura te mau animara i te pohe. Aita râ ta Iseraela mau animara i pohe. Noa ’tu râ, aita o Pharao i tuu.

I muri iho, ua parau Iehova ia Mose ia haere faahou e farerei ia Pharao e ia taora i te rehu i nia. Riro atura te rehu ei repo tei parare e tei haere i nia i te nunaa Aiphiti. No tera rehu i î ai te tino o to Aiphiti e o ta ratou mau animara i te fêfê mauiui mau. Noa ’tu râ, ua patoi Pharao i te vaiiho i to Iseraela ia haere ê atu.

Ua tono faahou Iehova ia Mose ia farerei ia Pharao no te faaite i ta ’Na poroi: ‘Te patoi noâ ra anei oe i te vaiiho i to ’u nunaa ia haere ê atu? Ananahi e topa te  ûa paari i nia i te fenua.’ Te mahana i muri iho, ua faatupu Iehova i te ûa paari, te patiri e te auahi. Tera te vero ino roa ’‘e ta Aiphiti i faaruru a‘enei. Ua oti roa te mau tumu raau e te mau faaapu, aita râ te reira i tupu i Gosena. Ua parau Pharao: ‘Taparu ia Iehova ia faaea te reira! E nehenehe outou e haere ê atu.’ Tera râ, i te taime iho â te ûa paari e te ûa i faaea ’i, ua taui faahou Pharao i to ’na mana‘o.

I muri iho, ua parau Mose: ‘I teie nei, e amu te mau vivi i te mau raau tupu atoa e toe ra i muri a‘e i te vero ûa paari.’ E mirioni vivi tei amu pauroa i tei toe i roto i te mau faaapu e i nia i te mau tumu raau. Ani atura Pharao: ‘Taparu ia Iehova ia faaore i te mau vivi.’ Noa ’tu râ ua faaore Iehova i te vivi, aita Pharao i tuu.

Parau atura Iehova ia Mose: ‘A toro i to oe rima i te ra‘i.’ Oioi te ra‘i i te poiri roa mai. E toru mahana i te maoro, aita roa ’tu to Aiphiti i nehenehe e ite i te tahi atu aore ra i te tahi noa ’‘e mea. O to Iseraela ana‘e tei fana‘o i te maramarama i to ratou fare.

Ua parau Pharao ia Mose: ‘E nehenehe oe e to oe nunaa e haere ê atu. Ia vai noa râ te mau animara i ô nei.’ Pahono atura Mose: ‘E mea tia ia rave matou i ta matou mau animara, ia nehenehe matou e pûpû i te tusia ia Iehova.’ Riri rahi atura Pharao. Tuô atura oia: ‘A haere i rapae! Ia ite faahou vau ia oe, e haapohe au ia oe.’

“Ei reira outou e ite ai i te huru-ê-raa i te taata parau tia e te taata parau ino, i te taata i haamori i te Atua, e te taata e ore e haamori ia ’na.”—Malaki 3:18