Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 67

Te mau patu o Ierusalema

Te mau patu o Ierusalema

I te tau o Ezera, i ora na te hoê tavini a te arii Aretehasaseta, o Nehemia to ’na i‘oa. E taata Iseraela oia o tei ora i Susana, te hoê oire Peresia. Ua tae mai to Nehemia taeae, mai te oire o Iuda ra, e ua faatae oia i teie poroi peapea mau: ‘Mea atâta mau no te nunaa tei ho‘i i Ierusalema. Aita te mau patu o te oire e te mau uputa ta to Babulonia i tuparari i patu-faahou-hia.’ Ua huru ê roa o Nehemia. Ua hinaaro oia e haere i Ierusalema no te tauturu atu. Ua pure atura oia i te Atua ia nehenehe te arii e faatia ia ’na ia haere atu.

I muri iho, ua ite te arii e ua mauiui o Nehemia. Ua parau oia: ‘A tahi ra vau i ite ai ia oe mai tera. Eaha te fifi?’ Ua pahono Nehemia: ‘Ua mauiui vau no te mea aita to ’u oire o Ierusalema i patu-faahou-hia.’ Ua ani atura te arii: ‘Eaha ta oe e hinaaro ia rave au?’ Oioi Nehemia i te pure i roto i to ’na aau. Ua parau atura oia: ‘A vaiiho na ia haere au i Ierusalema no te patu faahou i te mau patu.’ Ua faatia te arii Aretehasaseta ia haere Nehemia i ǒ e ua rave te arii i te mau faanahoraa ia nehenehe to ’na tere e tupu maitai. Ua faariro atoa te arii ia Nehemia ei tavana i Iuda e ua horoa ’tu i te mau raau no te mau uputa o te oire.

I to Nehemia taeraa ’tu i Ierusalema, ua hi‘opoa oia i te mau patu o te oire. I muri iho, ua haaputuputu oia i te mau tahu‘a e te mau taata faatere a na ô atu ai: ‘Mea fifi mau te tupuraa. E mea titauhia ia haa tatou.’ Ua farii te nunaa i te reira e ua haamata ratou i te patu faahou i te mau patu.

Ua faaooo râ vetahi o te mau enemi o Iseraela e ua parau ratou: ‘E nehenehe te hoê urî taehae e faatopa i te patu ta outou e patu ra.’ Aita râ te feia rave ohipa i tâu‘a a‘e i ta ratou mau parau e ua tamau ratou i te ohipa paturaa. Mea teitei e mea paari a‘e te patu i teie nei.

Ua faaoti atura te mau enemi ia haere i te mau vahi atoa i Ierusalema no te aro huna i te nunaa. Ua ite te ati Iuda i ta ratou opuaraa e ua riaria roa ratou. Ua parau râ Nehemia: ‘Eiaha e mǎta‘u. E tauturu mai Iehova ia tatou.’ Ua maiti oia i te mau taata tiai no te paruru i te feia rave ohipa. Aita ïa te mau enemi i nehenehe e aro ia ratou.

 Ua titauhia e 52 noa mahana no te faahope roa i te mau patu e te mau uputa. Ua parau Nehemia i te ati Levi atoa i Ierusalema ia faatupu i te avariraa. Ua tatuhaa oia ia ratou na roto e piti pǔpǔ himene. Ua haere ratou i nia i te patu ma te faaohipa i te mau taahiraa i te uputa pape pihaa ra. I muri iho, ua haere na pǔpǔ himene e piti i to ratou pae no te haaati i te oire. Ua faata‘i ratou i te pu, ua faaohipa ratou i te mau sumebalo e kinura e ua himene ratou no Iehova. Ua apiti o Ezera i te hoê pǔpǔ e ua apiti o Nehemia i te tahi atu pǔpǔ no te tapae i te hiero. Ua pûpû te mau taata atoa, oia hoi te mau tane, vahine e tamarii, i te mau tusia na Iehova e ua faatupu ratou pauroa i tera oroa avariraa. Ua himene ratou ma te puai e te oaoa e ua faaroohia to ratou reo i te vahi atea.

“Te mauhaa ra no oe i hamanihia ’i ra, e ore ïa e tupu.”—Isaia 54:17

No te ite atu â

VIDEO OMUARAA PARAU O TE MAU BUKA BIBILIA

Omuaraa parau o te buka Nehemia

E faaite mai te buka Bibilia Nehemia te tahi mau haapiiraa faufaa no te mau taata atoa o te haamori mau ra ia Iehova.