Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 88

Ua tapeahia o Iesu

Ua tapeahia o Iesu

Ua haere o Iesu e te mau aposetolo na roto i te peho no Kiderona no te tae i te mou‘a Oliveta i muri a‘e i te tuiraa po. Ua omenemene maitai te ava‘e. I to ratou taeraa ’tu i te ô i Getesemane, ua parau Iesu ia ratou: “A parahi na outou i ǒ nei e a ara.” Ua haere atura o Iesu i te hoê vahi aita i atea e ua tuturi oia. No to ’na hepohepo rahi, ua pure oia ia Iehova: “Ia tupu to oe hinaaro.” Ua tono atura Iehova i te hoê melahi no te faaitoito ia Iesu. I to Iesu ho‘iraa ’tu i ta ’na mau aposetolo ra, ua ite oia e te taoto ra ratou. Ua parau oia: ‘A ara! E ere te taime tano no te taoto! Fatata to ’u mau enemi i te tapea ia ’u.’

I taua taime, ua tae atura o Iuda. Ua aratai oia i te hoê nahoa taata, e ‘o‘e e e raau ta ratou. Ua ite oia teihea roa o Iesu no te mea pinepine ratou i te haere i tera ô. Ua parau o Iuda i te mau faehau e na ’na e faaite ia ratou o vai o Iesu. Ua haere oia ia Iesu ra ma te parau: ‘Ia ora na, Orometua.’ E ua apa ’tura oia ia ’na. Ua parau atura Iesu: ‘E Iuda, te taiva ra anei oe ia ’u ma te hoê apa?’

Ua haere atura o Iesu i te nahoa taata ra no te ani atu: “O vai ta outou e imi nei?” Ua pahono ratou: “O Iesu no Nazareta.” Ua pahono atura oia: “O vau ïa.” Ua otohe atura te mau taata e ua topa ratou i raro. Ua ani faahou o Iesu i te nahoa taata: “O vai ta outou e imi nei?” Ua pahono faahou ratou: “O Iesu no Nazareta.” Ua pahono atura Iesu: ‘Ua parau atu hoi au e o vau. A tuu ïa i tera mau tane ia haere.’

I to Petero taaraa eaha te tupu ra, ua rave oia i te hoê ‘o‘e e ua tapu oia i te tari‘a o te hoê tavini a te tahu‘a rahi, o Malako to ’na i‘oa. Ua tapea râ o Iesu i to Malako tari‘a e ua ora ihora oia. Ua parau atura Iesu ia Petero: ‘A faaho‘i i ta oe ‘o‘e i roto i te vehî. Ia aro oe ma te rave i te ‘o‘e, e pohe ïa oe i te ‘o‘e.’ Ua haru atura te mau faehau ia Iesu e ua taamu ratou i to ’na na rima. Ua horo ê atura te mau  aposetolo. I muri iho, ua afai te nahoa taata ia ’na i te tahu‘a tiaau, o Ana to ’na i‘oa. Ua uiui o Ana ia Iesu e ua afai oia ia ’na i te fare o Kaiapha, te tahu‘a rahi. Eaha râ tei tupu no te mau aposetolo?

“E ati to outou i roto i teie nei ao, a faaitoito râ! Ua vî teie nei ao ia ’u.”—Ioane 16:33