Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 77

Te vahine i te apoo pape

Te vahine i te apoo pape

I muri a‘e i te oroa Pasa, ua tere o Iesu e ta ’na mau pǐpǐ mai Samaria e tae atu i Galilea. I pihai iho i te oire o Sikara, ua faaea Iesu i te hoê vahi piihia te apoo pape a Iakoba. A faafaaea ’i oia i reira, ua haere ta ’na mau pǐpǐ i te oire no te hoo mai i te maa.

Ua haere atura te hoê vahine i te apoo pape no te huti i te pape. Ua parau atura Iesu ia ’na: “Horoa mai na maa pape ia inu vau.” Ua pahono atura oia: ‘No te aha oe e paraparau ai ia ’u? E vahine Samaria vau. Eita hoi te ati Iuda e paraparau i to Samaria.’ Ua parau atura Iesu ia ’na: ‘Ahiri oe i ite ai o vai au, o oe te ani mai maa pape no te inu e e horoa ’tu vau ia oe i te pape ora.’ Ua ani atura te vahine: ‘Eaha ïa te auraa? Aita hoi ta oe e farii pape.’ Ua pahono atura Iesu: ‘Te taata o te inu i te pape ta ’u e horoa ’tu, e ore roa ïa e poihâ faahou.’ Ua parau atura te vahine: “Horoa mai na i taua pape ra.”

I muri iho, ua parau Iesu: ‘Afai mai na i ta oe tane i ǒ nei i te apoo pape.’ Ua na ô atura te vahine: ‘Aita ta ’u e tane faaipoipo.’ Ua pahono atura Iesu: ‘E parau mau tera. Ua faaipoipohia oe e pae taime e i teie nei, te faaea ra oe e te hoê tane aita orua i faaipoipohia.’ Ua parau atura te vahine: ‘Papu maitai ia ’u e e peropheta oe. Te tiaturi nei to ’u nunaa e e nehenehe tatou e haamori i te Atua i teie mou‘a. Te parau nei râ te ati Iuda e mea tia ia haamori i te Atua i Ierusalema noa. Te tiaturi nei au e ia tae mai te Mesia, e haapii mai oia e nafea ia haamori i te Atua.’ Ua parau atura Iesu i te hoê parau ta ’na i ore i faaite a‘enei: ‘O vau te Mesia.’

 Oioi te vahine i te haere i to ’na oire e i te parau i to Samaria: ‘Mana‘o ana‘e vau, ua ite au te Mesia. Ua ite oia i te mau mea atoa no nia ia ’u. A haere mai e farerei ia ’na!’ Ua apee atura ratou i te vahine no te haere i te apoo pape e ua faaroo ratou ia Iesu i te haapii atu.

Ua titau manihini to Samaria ia Iesu ia faaea i to ratou oire. E piti mahana i te maoro, ua haapii atu Iesu i taua oire ra e e rave rahi taata tei faatupu i te faaroo ia Iesu. Ua parau ratou i te vahine Samaria: ‘Ua faaroo matou i tera taata e ua papu ia matou o oia iho â te faaora o teie ao.’

“‘A haere mai!’ E te taata e poihâ ra, ia haere mai ïa, e te taata atoa e hinaaro, ia rave noa mai ïa i te pape o te ora.”—Apokalupo 22:17