Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 16

O vai o Ioba?

O vai o Ioba?

I te fenua o Uza, i ora na te hoê taata o tei haamori ia Iehova. O Ioba to ’na i‘oa. E taata moni roa oia e e utuafare rahi to ’na. E taata maitai oia o tei tauturu i te feia veve, te mau vahine ua pohe ta ratou tane e te mau tamarii aita faahou to ratou na metua. Inaha ua rave noa Ioba i te mea tia, te auraa ra e eita roa ’tu oia e roohia i te fifi?

Aita Ioba i ite a‘e e te mataitai noa ra Satani te Diabolo ia ’na. Parau atura Iehova ia Satani: ‘Ua ite anei oe i ta ’u tavini o Ioba? Aita ’tu taata mai ia ’na i nia i te fenua nei. Te faaroo noa ra oia ia ’u e te rave noa ra oia i te mea tia.’ Na ô atura Satani: ‘E faaroo iho â Ioba ia oe, inaha te paruru ra e te haamaitai ra oe ia ’na. Te horoa nei oe ia ’na i te fenua e i te mau animara. A tatara na râ pauroa i te reira, e faaea oia i te haamori ia oe.’ Pahono atura Iehova: ‘E nehenehe oe e tamata i te faaroo o Ioba, eiaha râ e haapohe ia ’na.’ No te aha Iehova i vaiiho ai ia Satani ia tamata i to Ioba faaroo? No te mea ua tiaturi papu Iehova e eita Ioba e faarue ia ’na.

Haamata ’tura Satani i te tamata i to Ioba faaroo ma te faatupu e rave rau ati. Na mua roa, ua tono oia i te hoê pǔpǔ taata no Seba no te eiâ i te mau puaatoro e asini a Ioba. I muri iho, ua pohe pauroa te mau mamoe a Ioba na roto i te auahi. Ua eiâ te tahi atu pǔpǔ taata no Kaladaio i ta ’na mau kamela. Ua haapohehia te mau tavini o tei haapao i taua mau animara ra. I muri iho, ua faaruru Ioba i te ati rahi roa ’‘e, oia hoi te pohe o ta ’na mau tamarii atoa. Ua topa i nia ia ratou te fare i reira ratou i arearea ’i. Ua mauiui roa Ioba. Aita râ oia i faaea i te haamori ia Iehova.

 Ua hinaaro Satani ia mauiui rahi atu â Ioba. No reira i î roa ’i to Ioba tino i te fêfê. Ua mauiui rahi Ioba. Aita roa ’tu oia i ite no te aha i tupu ai tera mau ohipa. Ua tamau râ oia i te haamori ia Iehova. Ua ite te Atua i te mau mea atoa tei tupu e ua oaoa roa oia ia Ioba.

I muri iho, ua tono Satani e toru taata no te tamata i to Ioba faaroo. Ua parau ratou ia ’na: ‘Ua hara rahi oe e ua tamata oe i te huna i te reira. Te faautua ra te Atua ia oe.’ Na ô atura Ioba: ‘Aita roa ’tu vau i rave i te ino.’ Ua haamata râ oia i te mana‘o e na Iehova i faatupu i ta ’na mau fifi. Ua faaite atoa oia e e ere i te mea tia ta te Atua i rave i nia ia ’na.

Te vai ra hoê taata apî tei faaroo i te aparauraa. O Elihu to ’na i‘oa. Parau atura oia: ‘Mea hape pauroa ta outou i parau. Mea maitai iho â te Atua. Eita roa ’tu oia e rave i te ino. E nehenehe oia e ite i te mau mea atoa e e tauturu i te taata ia faaruru i to ratou mau fifi.’

Paraparau atura Iehova ia Ioba, na ô atu ai: ‘Teihea roa oe a poiete ai au i te ra‘i e te fenua? No te aha oe i parau ai e e ere au i te mea tia? Paraparau noa ra oe, aita râ oe e taa nei no te aha teie mau ohipa e tupu ra.’ Ua farii Ioba i ta ’na hape. Parau atura oia: ‘Ua hape au. Ua faarooroo vau no nia ia oe, i teie nei râ ua ite maitai au o vai oe. E nehenehe oe e rave i te mau ohipa atoa. Te tatarahapa nei au no ta ’u i parau.’

I te otiraa te tamataraa, ua maitai faahou â Ioba maoti Iehova. Ua horoa ’toa Iehova ia ’na hau atu â mau tao‘a. Ua ora maoro Ioba e ua oaoa oia. Ua haamaitai Iehova ia Ioba no te mea ua faaroo oia ia ’na noa ’tu mea fifi roa te mau tupuraa ta ’na i faaruru. E pee atoa anei oe i to Ioba hi‘oraa e e tamau anei oe i te haamori ia Iehova, noa ’tu eaha te tupu?

“Ua faaroo outou i te faaoromai tamau o Ioba e ua ite outou i ta Iehova i rave.”—Iakobo 5:11

No te ite atu â

VIDEO OMUARAA PARAU O TE MAU BUKA BIBILIA

Omuaraa parau o te buka Ioba

E tamatahia te feia atoa o te here ra ia Iehova. Te horoa mai ra te aamu o Ioba i te haapapuraa e e nehenehe tatou e tapea i to tatou taiva ore e e turu i to Iehova mana arii.