Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 35

Ua ani Hana ia Iehova i te hoê tamaiti

Ua ani Hana ia Iehova i te hoê tamaiti

E taata Iseraela o Elikana. E piti vahine ta ’na: o Hana e o Penina. Mea here a‘e râ Elikana ia Hana. Ua tamau Penina i te faaooo ia Hana no te mea aita ta Hana e tamarii. Mea rahi râ ta Penina tamarii. I te matahiti taitahi, e haere Elikana e to ’na utuafare e haamori ia Iehova i te sekene i Silo. I te hoê taime, a haere ai ratou i ǒ, ua ite o Elikana e ua mauiui roa ta ’na vahine here e, o Hana. Ua parau atu: ‘Eiaha na e ta‘i, Hana. E ere o oe ana‘e, tei ia oe râ vau. E ua here au ia oe.’

I muri iho, ua haere Hana e pure o ’na ana‘e. Ua ta‘i noa o ’na a taparu ai ia Iehova ia tauturu ia ’na. Ua euhe oia: ‘E Iehova e, a horoa mai na hoê tamaiti na ’u. E horoa ’tu vau ia ’na ia oe e e tavini oia ia oe i te roaraa o to ’na oraraa.’

Ua ite te tahu‘a rahi, o Eli to ’na i‘oa, e te ta‘i ra o Hana. Ua mana‘o oia e ua taero Hana. Ua parau atura Hana: ‘Aita vau i inu i te ava, e ta ’u fatu e. E fifi rahi to ’u e te faaite nei au i te reira ia Iehova.’ Ua taa ’tura ia Eli e ua hape oia e ua parau atura oia: ‘Ia horoa te Atua i ta oe i ani atu.’ Ua maitaihia o Hana e ua ho‘i oia. Tau taime i muri iho, ua fanau a‘era oia i te hoê tamaiti, o Samuela to ’na i‘oa. Ua oaoa roa o Hana, e ere anei?

Aita o Hana i haamo‘e i ta ’na i euhe ia Iehova. I te taime Samuela i faaea ’i i te inu i te û a to ’na mama, ua afai Hana i ta  ’na tamaiti i te sekene no te tavini atu. Ua parau oia ia Eli: ‘Teie te tamaiti ta ’u i ani ia Iehova. I te roaraa o to ’na oraraa, e horoa vau ia ’na ia Iehova.’ Ua haere o Elikana raua Hana e farerei ia Samuela i te matahiti taitahi ma te afai atu i te hoê ahu apî aita e rima ahu. Maoti te tauturu a Iehova, ua fanau Hana e toru atu â tamaroa e e piti tamahine.

“A tamau i te ani, e horoahia mai. A tamau i te imi, e itehia mai.”—Mataio 7:7