Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 96

Ua maiti o Iesu ia Saulo

Ua maiti o Iesu ia Saulo

E taata no Roma o Saulo e ua fanauhia oia i Tareso. E Pharisea oia e mea ite roa oia i te ture ati Iuda. Mea hae roa na ’na te mau Kerisetiano. Ua haru oia i te mau tane e vahine tei to ratou iho fare no te huri atu i roto i te fare tapearaa. Ua tia atoa oia no te mataitai i te hoê pûpû taata iria tei haapohe ia Setephano ma te pehi atu i te ofai.

No Saulo râ, aita i navai ia tapeahia te mau Kerisetiano i Ierusalema noa. Ua ani atura oia i te tahu‘a rahi ia tono ia ’na i te oire o Damaseko no te a‘ua‘u i te mau Kerisetiano i ǒ. A piri ai o Saulo i te oire, ua anaana taue mai te hoê maramarama puai e ati a‘e ia ’na e ua topa oia i raro. Ua faaroo oia i te hoê reo tei parau: ‘Saulo, no te aha oe e hamani ino ai ia ’u?’ Ua ani atura o Saulo: ‘O vai oe?’ Teie te pahonoraa: ‘O vau o Iesu. A haere i Damaseko e e haapii mai oe eaha te mea tia ia rave.’ Ua riro atura o Saulo ei taata matapo e ua titauhia ia aratai rima ia ’na e tae roa ’tu i te oire.

I Damaseko, i vai na te hoe Kerisetiano taiva ore, o Anania to ’na i‘oa. Maoti te hoê orama, ua parau Iesu ia ’na: ‘A haere i te fare o Iuda i te aroâ parauhia Afaro e a imi ia Saulo.’ Ua na ô atura Anania: ‘E te Fatu e, ua ite au o vai tera taata! Te huri nei oia i ta oe mau pǐpǐ i roto i te fare tapearaa!’ Ua parau râ o Iesu: ‘A haere e farerei ia ’na. Ua maiti au ia Saulo no te poro i te parau apî oaoa i e rave rahi nunaa.’

Ua imi atura o Anania ia Saulo e ua parau oia ia ’na: ‘Saulo, to ’u taeae, ua tono Iesu ia ’u ia ite faahou oe.’ I taua iho â taime, ua ite faahou o Saulo. Ua haapii mai oia no nia ia Iesu e ua riro atura oia ei pǐpǐ na ’na. Ua bapetizohia o Saulo ei Kerisetiano e ua haamata oia i te poro i te mau sunago e ta ’na mau hoa Kerisetiano. A feruri na i te ati Iuda tei huru ê roa a ite ai ia Saulo i te poro i te mau taata no nia ia Iesu. Ua parau ratou: ‘E ere  anei tera taata tei matau i te a‘ua‘u i te mau pǐpǐ a Iesu?’

E toru matahiti i te maoro, ua poro o Saulo i te mau taata i Damaseko. Ua riri roa te ati Iuda ia Saulo e ua opua ratou i te haapohe ia ’na. Ua faarooroo râ te mau taeae no nia i tera opuaraa ino e ua tauturu ratou ia ’na ia horo ê. Ua tuu ratou ia ’na i roto i te hoê farii e ua haapou ratou ia ’na na roto i te hoê apoo o te patu o te oire.

Ua haere atura o Saulo i Ierusalema e ua tamata oia i te amui e te mau taeae i ǒ. Ua riaria roa râ ratou ia ’na. Na te hoê pǐpǐ mǎrû, o Baranaba to ’na i‘oa, i afai ia Saulo i te mau aposetolo e i haapapu atu e ua taui iho â o Saulo. Ua haamata o Saulo i te poro i te parau apî oaoa e te amuiraa i Ierusalema ma te itoito rahi. I muri iho, ua piihia oia o Paulo.

“Ua haere mai te Mesia ra o Iesu i te ao nei no te faaora i te feia hara. O vau nei hoi te taata hara roa ’‘e.”—Timoteo 1, 1:15