Eaha to roto?

Tapura tumu parau

 HAAPIIRAA 71

Ua paruru Iehova ia Iesu

Ua paruru Iehova ia Iesu

I te hoê fenua i te pae hitia o te râ o Iseraela, i vai na te mau taata o tei manaˈo e e nehenehe te mau fetia e aratai ia ratou. I te hoê po, ua ite vetahi mau tane no tera fenua i te hoê mea maere mau i nia i te raˈi. E au te reira i te hoê fetia purapura o te tere ra. Ua apee ratou i te reira e ua arataihia ratou i Ierusalema. Ua haamata ˈtura teie mau tane i te ani i te mau taata: ‘Teihea roa te tamarii o te riro ei arii o te ati Iuda? Ua haere mai matou no te tipapa i mua ia ˈna.’

Ua faaroo o Heroda, te arii o Ierusalema, no nia i te hoê arii apî. Ua peapea ˈtura oia. Ua ani atura oia i te mau tahuˈa tiaau: ‘Ia au i tei parauhia, ihea tera arii e fanauhia ˈi?’ Ua pahono atura ratou: ‘Ua parau te mau peropheta e e fanauhia oia i Betelehema.’ Ua pii atura o Heroda i te mau tane no te pae hitia o te râ e ua parau oia ia ratou: ‘A haere i Betelehema e a imi i tera tamarii. A hoˈi mai no te faaite teihea roa oia. Te hinaaro atoa nei au e tipapa i mua ia ˈna.’ E parau haavare râ hoi te reira.

Ua tere faahou te mea purapura i te raˈi e au ra i te fetia. Ua apee te mau tane i te reira e tae roa ˈtu i Betelehema. Ua faaea te mea purapura i nia noa ˈˈe i te hoê fare e ua tomo taua mau tane ra i roto i tera fare. Ua ite ratou ia Iesu e to ˈna metua vahine, o Maria. Ua tipapa ˈtura ratou i mua i te tamarii e ua pûpû atura ratou i te auro, te tapau libano e te tapau mura ei ô na ˈna. Na Iehova iho â anei i afai i tera mau tane ia Iesu ra? E ere.

I taua po ra, ua parau Iehova ia Iosepha na roto i te hoê moemoeâ: ‘Te hinaaro ra o Heroda e haapohe ia Iesu. A rave i ta oe vahine e ta oe tamarii e a haere i Aiphiti. A vai i ǒ e tae roa ˈtu i te taime e parau atu vau e nehenehe outou e hoˈi i te fenua.’ Oioi Iosepha e to ˈna utuafare i te haere i Aiphiti.

Ua faaite Iehova i te mau tane no te pae hitia o te râ ia ore e hoˈi ia Heroda ra. A taa ˈi Heroda e eita ratou e hoˈi ia ˈna ra, ua riri roa oia. Inaha aita oia i nehenehe e ite teihea roa o Iesu, ua faaue oia ia taparahi-haapohe-hia te mau  tamaroa atoa i Betelehema e hoê â matahiti to ratou i to Iesu. Auaˈe râ tei atea roa o Iesu, i Aiphiti!

I muri iho, ua pohe o Heroda. Ua parau Iehova ia Iosepha: ‘I teie nei, e nehenehe outou e hoˈi i to outou fenua.’ Ua hoˈi ïa o Iosepha, Maria e o Iesu i Iseraela e ua hamani ratou i to ratou fare i te oire o Nazareta.

“Oia atoa te parau no roto i to ˈu nei vaha; . . . e noaa hoi te mea i faaue atu ai au ra.”—Isaia 55:11