Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 40

Davida e Golia

Davida e Golia

Ua parau Iehova ia Samuela: ‘A haere i ǒ Iese. E riro hoê o ta ’na mau tamaiti ei arii apî no Iseraela.’ Ua haere atura Samuela i ǒ Iese. A ite ai oia i te tamaiti paari a‘e a Iese, ua mana‘o oia: ‘Papu maitai o tera taata apî tei maitihia.’ Ua parau râ Iehova ia Samuela e e ere oia ta ’na i maiti. Ua na ô Iehova: ‘Te ite nei au i te huru mau o te taata, eiaha noa i to ’na huru i rapaeau.’

E ono atu â tamaiti ta Iese i faaite ia Samuela. Ua parau râ Samuela: ‘Aita Iehova i maiti ia ratou. E tamaiti atu â ta oe?’ Ua pahono Iese: ‘E, o ta ’u tamaiti apî a‘e, o Davida. Ua haere oia e haapao i ta ’u mau mamoe.’ A tae mai ai Davida i te fare, ua parau Iehova ia Samuela: ‘O oia ta ’u i maiti!’ Ua manii Samuela maa hinu i nia i to Davida upoo no te faariro ia ’na ei arii apî no Iseraela.

Tau taime i muri a‘e, ua aro to Iseraela i to Philiseti. E tiapai aito tei aro no te mau Philiseti. O Golia to ’na i‘oa. I te mau mahana atoa, ua faaooo Golia i to Iseraela. Ua tuô oia: ‘A afai mai i te hoê taata o te aro ia ’u. Ia manuïa oia, e riro matou ei tǐtǐ na outou. Ia manuïa râ vau, e riro outou ei tǐtǐ na matou.’

Ua haere Davida i te puhapa a te mau faehau no Iseraela no te afai i te maa i to ’na mau taeae. E faehau atoa hoi to ’na mau taeae. Ua faaroo Davida i ta Golia i parau e ua na ô oia: ‘E aro vau ia ’na!’ Parau atura te arii Saula: ‘E tamarii noa hoi oe.’ Pahono atura Davida: ‘E tauturu mai Iehova ia ’u.’

E haana tama‘i to te arii Saula e ua hinaaro  oia ia faaohipa Davida i te reira. Ua parau râ Davida: ‘Eita vau e nehenehe e aro e tera haana tama‘i.’ Ua rave ihora Davida i ta ’na maa, hoê mauhaa faaohipahia no te taora puai i te ofai iti. Ua haere Davida i te anavai. Ua maiti oia e pae ofai iti manina e ua tuu oia i te reira i roto i ta ’na pute. I muri iho, ua horo Davida ia Golia ra. Ua tuô Golia: ‘Haere mai, tamarii iti e. E faatamaa vau i te mau manu o te ra‘i e i te mau animara taehae e to oe ra tino.’ Aita Davida i riaria. Ua pahono atu oia ma te tuô: ‘Te haere mai nei oe ma te ‘o‘e e te mahae. Te haere atu nei râ vau ma te i‘oa o Iehova. Aita oe e aro nei ia matou. Te aro nei oe i te Atua. E ite pauroa te taata i ǒ nei e e mea puai a‘e Iehova i te ‘o‘e e te mahae. E upootia matou i nia ia outou pauroa maoti Iehova.’

Ua tuu Davida i te hoê ofai iti i roto i ta ’na maa e ua faaohu oia i te reira ma te puai. Maoti ta Iehova tauturu, ua pee e ua tae te ofai i roto i te upoo o Golia. Ua topa atura Golia i raro e ua pohe atura. Ua horo ê atura to Philiseti no to ratou ora. Te tiaturi anei ra oe ia Iehova mai ta Davida i rave?

“I te taata, e ore e tia, i te Atua râ, oia ïa, e tia hoi i te Atua te mau mea atoa.”—Mareko 10:27