Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 13

Ua faatupu Iakoba raua Esau i te hau

Ua faatupu Iakoba raua Esau i te hau

Ua fafau Iehova ia Iakoba e e paruru Oia ia ’na mai ta ’Na i rave no Aberahama e no Isaaka. Ua haere Iakoba e ora i te hoê vahi parauhia Harana. I reira oia i faaipoipo ai e i rahi ai to ’na utuafare e ta ’na mau tao‘a.

Ua parau atura Iehova ia Iakoba: ‘A ho‘i i to oe fenua.’ Haamata ’tura Iakoba e to ’na utuafare i to ratou tere atea. I muri iho, a tere noa ’i ratou, ua haere vetahi mau tavini a Iakoba e farerei ia ’na no te parau atu: ‘Te haere mai ra to oe taeae e e 400 taata o te apee nei ia ’na!’ Ua mana‘o Iakoba e ua hinaaro Esau e haamauiui ia ’na e i to ’na utuafare. Riaria ’tura oia. Pure atura oia ia Iehova: ‘A faaora mai na ia ’u i te rima o to ’u taeae.’ Te mahana i muri iho, ua hapono Iakoba i te hoê ô ia Esau. E rave rahi ïa mamoe, puaaniho, puaatoro, kamela e asini.

I te hoê po, o Iakoba ana‘e, ua ite oia i te hoê melahi! Ua haamata te melahi i te taputô e o ’na. Ua taputô raua tae roa ’tu i te poipoi. Noa ’tu ua pepehia Iakoba, aita oia i tuu. Parau atura te melahi: ‘Vaiiho ia ’u!’ Ua na ô râ Iakoba: ‘Aita, a haamaitai ia ’u na mua.’

I te pae hopea, ua haamaitai te melahi ia Iakoba. Taa ’tura ia Iakoba e aita Iehova e vaiiho ia Esau ia haamauiui ia ’na.

I tera poipoi, ua hi‘o Iakoba i te atea e ua ite oia ia Esau e na 400 taata. Vaiiho atura Iakoba i to ’na utuafare i muri roa mai  ia ’na e pi‘o atura oia i mua i to ’na taeae e hitu taime. Horo atura Esau ia Iakoba no te tauahi ia ’na. Ta‘i atura raua toopiti e faatupu atura raua i te hau. No oe, eaha to Iehova huru a ite ai i te haerea o Iakoba i mua i tera tupuraa?

I muri a‘e, ua ho‘i Esau i to ’na fenua e ua tamau Iakoba i to ’na tere. E 12 tamaiti ta Iakoba. O Reubena ïa, Simeona, Levi, Iuda, Dana, Naphatali, Gada, Asera, Isakara, Zebuluna, Iosepha e Beniamina. Ua faaohipa Iehova hoê o ta Iakoba mau tamaiti no te faaora i to ’Na nunaa. O Iosepha ïa. Ua ite anei oe ua nafea oia? Ta tâua ia e ite i to muri nei haapiiraa.

“A here noa i to outou mau enemi e a pure noa no tei hamani ino ia outou, a riro atu ai outou ei tamarii na to outou Metua i te ra‘i.”—Mataio 5:44, 45