Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 15

Aita roa ’tu Iehova i faarue ia Iosepha

Aita roa ’tu Iehova i faarue ia Iosepha

A vai ai Iosepha i te fare tapearaa, ua moemoeâ te arii no Aiphiti, o Pharao, i te mau moemoeâ aita ’tu taata i nehenehe e faataa. Ua faaite hoê o ta ’na mau tavini e e nehenehe Iosepha e faaite atu i te auraa o ta Pharao mau moemoeâ. Faaue atura Pharao ia haere oioi e tii ia Iosepha.

Ani atura Pharao ia ’na: ‘Nehenehe anei oe e faataa mai i ta ’u mau moemoeâ?’ Pahono atura Iosepha: ‘E itehia i Aiphiti e hitu matahiti auhune e i muri iho e hitu matahiti o‘e. A maiti hoê taata î i te paari no te haaputu i te maa ia ore to oe nunaa e pohe i te poia.’ Parau atura Pharao: ‘O oe ta ’u e maiti! E riro ïa oe ei taata tiaraa teitei roa ’‘e i Aiphiti, i raro a‘e noa mai ia ’u!’ Nafea Iosepha i ite ai i te auraa o te mau moemoeâ a Pharao? Na Iehova i tauturu ia Iosepha.

I to muri a‘e na matahiti e hitu, ua haaputu Iosepha i te maa. I muri iho, ua tupu te o‘e i nia i te fenua atoa, mai ta Iosepha i parau. Ua haere mai ïa te mau taata na te ao nei e hoo mai i te maa ia Iosepha ra. Ua faaroo Iakoba, te metua tane o Iosepha, e e maa i ǒ Aiphiti. Tono atura oia i ta ’na na tamaiti e ahuru no te haere e hoo mai i te maa.

Ua haere te mau tamaiti a Iakoba ia Iosepha ra. Ua ite oioi Iosepha o vai ratou. Aita râ to ’na mau taeae i ite e o Iosepha tei mua ia ratou. Tipapa ’tura ratou i mua ia ’na, mai ta Iosepha i moemoeâ i to ’na apîraa. Ua hinaaro Iosepha e ite e e mea ino noâ anei ratou. Parau atura oia ia ratou: ‘E mau taata hi‘o haere outou. Hinaaro outou e ite mea paruparu anei matou.’ Na ô atura ratou: ‘Aita! E 12 taeae matou no Kanaana. Hoê o to matou taeae tei pohe e te taeae apî roa ’‘e, tei to matou metua tane ïa.’  Parau atura Iosepha: ‘Haere e tii i to outou taeae apî roa ’‘e. E tiaturi ïa vau ia outou.’ Ho‘i atura ratou i ǒ to ratou metua tane ra.

I te taime aita faahou e maa ta te utuafare, ua tono faahou Iakoba i ta ’na mau tamaiti i Aiphiti. I tera râ taime, ua rave atoa ratou ia Beniamina, to ratou taeae apî roa ’‘e. No te tamata i to ’na mau taeae, ua huna Iosepha i ta ’na hapaina ario i roto i te pute tari huero a Beniamina. I muri iho, ua faahapa Iosepha i to ’na mau taeae e ua eiâ ratou i ta ’na hapaina. Imi atura te mau tavini a Iosepha i te hapaina e ua ite ratou i te reira i roto i te pute a Beniamina. Huru ê roa to ’na mau taeae. Ua taparu ratou ia Iosepha ia faautua ia ratou, eiaha râ ia Beniamina.

Taa ’tura ia Iosepha e ua taui iho â to ’na mau taeae. Aita Iosepha i nehenehe faahou e huna i to ’na mau huru aau. Ua ta‘i roa oia e ua parau: ‘O vau o Iosepha, to outou taeae. Te ora noâ anei ra to ’u metua tane?’ Ua maere roa to ’na mau taeae. Parau atura oia: ‘Eiaha e inoino no ta outou i rave i nia ia ’u. Ua tono te Atua ia ’u i ǒ nei no te faaora ia outou. Haaviti, haere e tii i to ’u metua tane e afai mai ia ’na i ǒ nei.’

Ho‘i atura ratou i ǒ to ratou metua tane no te faaite i teie parau oaoa e no te afai ia ’na i Aiphiti. A tau matahiti hoi i teie nei, aita Iosepha i ite a‘e i to ’na metua tane. Ua amui faahou raua i teie nei.

“Ia ore râ outou e faaore i ta te taata ra hapa, e ore atoa ïa to outou Metua e faaore i ta outou.”—Mataio 6:15