Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 44

Te hoê hiero no Iehova

Te hoê hiero no Iehova

I muri a‘e i to Solomona riroraa ei arii no Iseraela, ua ani Iehova ia ’na: ‘Eaha ta oe e hinaaro ra ia horoa ’tu vau?’ Ua pahono Solomona: ‘Mea apî roa vau e eita vau e ite eaha te rave. A horoa mai na i te paari ia haapao maitai au i to oe nunaa.’ Ua na ô atura Iehova: ‘Ua ani mai oe ia î oe i te paari. E faariro ïa vau ia oe ei taata î roa ’‘e i te paari i nia i te fenua nei. E faariro atoa vau ia oe ei taata tao‘a rahi. Ia faaroo oe ia ’u, e ora maoro oe.’

Ua haamata Solomona i te patu i te hiero. Ua faaohipa oia i te auro maitai roa ’‘e, te ario, te raau e te ofai. Ua ohipa e tausani tane e vahine aravihi i roto i te paturaa o te hiero. Hitu matahiti i muri iho, ua oti te hiero e e nehenehe te reira e pûpûhia na Iehova. Te vai ra te hoê fata e e tusia i nia i te reira. Ua tuturi o Solomona i mua i te fata e ua pure oia: ‘E Iehova e, aita te rahi e te nehenehe o tera hiero e navai no te faahanahana ia oe. Tera râ, a farii na i ta matou haamoriraa e a faaroo i ta matou pure.’ Eaha ta Iehova i mana‘o no nia i te hiero e ta Solomona pure? I te taime iho â i oti ai Solomona i ta ’na pure, ua faatopa Iehova i te hoê auahi mai te ra‘i mai e ua ama mai te mau tusia i nia i te fata. A na reira ’i, ua faaite Iehova e ua farii oia i te hiero. A ite ai to Iseraela i te reira, ua oaoa roa ratou.

Ua matauhia te arii Solomona no to ’na paari i Iseraela e i te mau vahi atea atoa. Ua haere mai te mau nunaa e farerei ia Solomona no te ani i te tauturu no to ratou mau fifi. Ua haere atoa mai te arii vahine no Seba no te tamata i to ’na paari ma te tuu atu i te mau uiraa fifi mau. A faaroo ai oia i ta Solomona mau pahonoraa, ua parau te arii vahine: ‘Aita vau i tiaturi i ta te mau taata i parau mai no nia ia oe. I teie nei râ, te ite nei au e mea rahi a‘e to oe paari i ta te taata i faatia mai. Ua haamaitai to oe Atua ra o Iehova ia oe.’ Mea maitai roa te oraraa i Iseraela e mea oaoa roa te nunaa. E itehia râ te tahi mau tauiraa.

“Inaha râ, e taata to ǒ nei tei rahi a‘e ia Solomona.”—Mataio 12:42