Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 14

Ua faaroo te hoê tîtî i te Atua

Ua faaroo te hoê tîtî i te Atua

O Iosepha hoê o na tamaiti apî a‘e a Iakoba. Ua ite to ’na mau taeae paari a‘e e o Iosepha te tamaiti here roa ’‘e a to ratou metua tane. No oe, eaha ïa to ratou huru a ite ai i te reira? Pohehae atura ratou ia Iosepha e riri atura ratou ia ’na. I te hoê mahana, ua faaite Iosepha i to ’na mau taeae e mea ê ta ’na mau moemoeâ. Ua taa ia ratou e ua moemoeâ Iosepha e ia tae i te hoê mahana e tipapa ratou i mua ia ’na. Rahi roa ’tu ïa to ratou riri ia Iosepha!

I te tahi mahana, ua haere te mau taeae o Iosepha e haapao i te nǎnǎ i pihai iho i te oire o Sekema. Tono atura Iakoba ia Iosepha no te haere e hi‘o ia ratou no te ite mea maitai anei ratou. Na te atea, ua ite ratou ia Iosepha e parau atura ratou: ‘Era ’tu te taata moemoeâ! E taparahi haapohe ana‘e ia ’na!’ Haru atura ratou ia ’na no te taue atu i roto i te hoê apoo hohonu. Ua parau râ o Iuda, hoê o to ’na mau taeae: ‘Eiaha e haapohe ia ’na! E hoo ana‘e râ ia ’na ei tîtî.’ Hoo atura ratou ia Iosepha no e 20 moni ario i te hoê pǔpǔ taata hoo tao‘a no Midiana o te haere ra i Aiphiti.

I muri iho, ua tuu te mau taeae o Iosepha i to ’na ahu i roto i te toto puaaniho. Ua horoa ratou i te reira i to ratou metua tane ma te parau: ‘E ere anei te ahu o ta oe tamaiti?’ Mana‘o atura Iakoba e ua haapohe te hoê animara taehae ia Iosepha. Mauiui roa oia. Aita ’tu taata i nehenehe e tamahanahana ia ’na.

I Aiphiti, ua hoohia Iosepha ei tîtî i te hoê taata toroa, o Potiphara to ’na i‘oa. Ua haapao noa râ Iehova ia Iosepha. Ua ite Potiphara e mea maitai roa te ohipa a Iosepha e e nehenehe e tiaturi ia ’na. Aita i maoro, ua parauhia ia Iosepha ia haapao i te mau mea atoa a Potiphara.

Ua ite te vahine a Potiphara e mea nehenehe Iosepha e e tino pautuutu  to ’na. I te mau mahana atoa, ua taparu oia ia Iosepha ia taoto ia ’na. Eaha ta Iosepha i rave? Ua patoi oia e ua parau: ‘Aita! Mea ino tera. Te tiaturi nei ta ’u fatu ia ’u e e vahine oe na ’na. Ia taoto vau ia oe ra, e hara vau i mua i te Atua!’

I te hoê mahana, ua tamata te vahine a Potiphara i te faahepo ia Iosepha ia taoto ia ’na. Haru atura te vahine i to Iosepha ahu, ua horo ê râ o Iosepha. I ho‘i mai Potiphara i te fare, ua parau ta ’na vahine e ua haru Iosepha ia ’na no te taoto ia ’na. E parau haavare hoi te reira. Riri rahi atura Potiphara e tuu atura oia ia Iosepha i te fare tapearaa. Aita râ Iehova i faarue ia Iosepha.

“No reira, a faahaehaa ia outou iho i raro a‘e i te rima puai o te Atua, ia faateitei oia ia outou i te taime tano.”—Petero 1, 5:6